Մոսկվան անհանգստացած է Հյուսիսային Կորեայի արձակած հրթիռներով
Հյուսիսային Կորեայի արձակած բալիստիկ հրթիռը սպառնալիք է Ռուսաստանի Հեռավոր արևելքի համար: Այս մասին այսօր՝ ապրիլի 5-ին, РИА Новости-ին հայտնել է Ռուսաստանի պաշտպանության և անվտանգության դաշնային խորհրդի հանձնաժողովի ղեկավար Վիկտոր Օզերովը:
«Մեր Հեռավոր արևելքին վտանգ է սպառնում, քանզի հրթիռի արձակման ընթացքում սխալներ կարող են լինել, և մենք պետք է զգոն լինենք մեր օդային տարածքները պաշտպանելիս»,- ասել է Օզերովը: Նա վստահեցրել է, որ օդատիեզերական ուժերի ստորաբաժանումները բարձր պատրաստվածության են բերվել:
Պատգամավորը նշել է նաև, որ Մոսկվան պատրաստ է միջամտել Փհենյանի հետ միջուկային հարցի շուրջ ընթացող բանակցություններին, եթե մյուս երկրներն այլևս չհրահրեն Հյուսիսային Կորեային: Նա հիշեցրել է, որ ԱՄՆ-ն Հարավային Կորեայի հետ համատեղ զորավարժություններ է անցկացնում և տարածաշրջանում զարգացնում հակահրթիռային պաշտպանության համակարգը:
Ավելի վաղ «Յոնհապ» տեղեկատվական գործակալությունը տարածել էր Հարավային Կորեայի պաշտպանության նախարարության հայտարարությունը, ըստ որի՝ Հյուսիսային Կորեայի տարածքից «անհայտ հրթիռ» է արձակվել ճապոնական ծովի ուղղությամբ: ԱՄՆ Զինված ուժերի խաղաղօվկիանոսյան հրամանատարությունը հայտնել էր, որ դա միջին հեռավորության KN-15 հրթիռ է եղել: Ավելի ուշ այս տվյալները հաստատել է նաև ԱՄՆ պետքարտուղար Ռեքս Թիլերսոնը:
Մարտի սկզբին Հյուսիսային Կորեան մի քանի հրթիռ էր արձակել՝ Ճապոնիայում ամերիկյան ռազմաբազաներին հարված հասցնելու նպատակով: Դա տեղի էր ունեցել Հարավային Կորեայի և ԱՄՆ-ի համատեղ զորավարժությունների ընթացքում: