Հյուսիսային Կորեան սպառնում է ոչնչացնել ԱՄՆ-ի Զինված ուժերը

Հյուսիսային Կորեան սպառնում է հենց ԱՄՆ-ի տարածքում ոչնչացնել ամերիկյան զորքերը, եթե նույնիսկ չնչին ագրեսիա զգա իր նկատմամբ։ Այս մասին ասվում է հյուսիսկորեական ազգային «Նոդոն Սինմուն» թերթի ապրիլի 5-ի հրապարակման մեջ։

«Մեր դիրքորոշումն այս է. եթե Միացյալ Նահանգները փորձի հարձակման նշույլ անգամ ցույց տալ, ապա մենք կփոշիացնենք նրանց զորքերը ոչ միայն Հարավային Կորեայում, այլև հենց իրենց երկրի տարածքում», - գրում է թերթը։

Համաձայն հրապարակման՝ Հյուսիսային Կորեայի կողմից «կանխարգելիչ» այդ հարվածը կլինի բացարձակ արդարացված։

«Բավական է սեղմել կոճակը, և Ամերիկան փոշու կվերածվի։ ԱՄՆ-ն պետք է հասկանա, որ Կորեական թերակղզում ագրեսորը չի կարող խուսափել զոհերից», - նշում է Կորեայի բանվորական կուսակցության կենտրոնական կոմիտեն։

Հիշեցնենք, որ ապրիլի 4-ի լույս 5-ի գիշերը Հյուսիսային Կորեան հրթիռային փորձարկում էր կատարել Սինփո բնակավայրում։ Սեուլի հայտնած տվյալների համաձայն՝ բալիստիկ հրթիռը, թռչելով մոտ 60 կիլոմետր, ընկել է ճապոնական ծովը։