Ֆրանսիայի նախագահական ընտրություններում հաղթողի ամենահավանական թեկնածուները հակադիր դիրքորոշում ունեն Եվրամիության հարցում
Ֆրանսիայի «Ազգային ճակատ» կուսակցության առաջնորդ Մարին Լը Պենին եվրոպական մի շարք երկրներ քննադատում են նախագահի թեկնածուների մջև ապրիլի 4-ին տեղի ունեցած երկրորդ նախընտրական հեռուստաբանավեճից հետո:
Կենտրոնամետ թեկնածու Էմանուել Մարկոնն ասել է, որ Լը Պենի ազգայնական գաղափարները հանգեցնելու են «տնտեսական պատերազմի»:
Լը Պենը մեղադրվում է նաև Ֆրանսիայի՝ Եվրամիության անդամակցությունը չխրախուսելու համար:
Միևնույն ժամանակ, Ֆրանսուա Ֆիյոնն ասել էր, որ Ֆրանսիան ունի Եվրոպայի կարիքը ԱՄՆ-ի և Չինաստանի դեմ պայքարում:
«Ազգային ճակատ» կուսակցության նախագահ Մարին Լը Պենը խոստացել է ամրացնել Ֆրանսիայի սահմանները և հրաժարվել եվրոյից, կամ էլ հանրաքվե անցկացնել ԵՄ անդամակցության հարցով:
Էկոնոմիկայի նախկին նախարար Էմանուել Մակրոնը մեղադրել է Լը Պենին ստելու մեջ՝ ասելով, որ «ազգայնականությունը պատերազմ է»:
Անդրադառնալով երկրի անվտանգությանը՝ Լը Պենը Ֆրանսիան « ջիհադիստների համալսարան է» անվանել. նրան ընդհատել են ձախակողմյան քաղաքական դիրքորոշում ունեցող թեկնածուների վրդովված բացականչությունները:
Հիշեցնենք, որ Ֆրանսիայի նախագահական ընտրությունների առաջին փուլը կկայանա ապրիլի 23-ին: Եթե թեկնածուներից որևէ մեկը չհավաքի 50 %-ից ավել ձայն, երկու թեկնածուները կմասնակցեն ընտրությունների երկրորդ փուլին, որը կանցկացվի մայիսի 7-ին:
Բազմաթիվ սոցհարցումների համաձայն՝ Լը Պենը և Մարկոնը «կբախվեն» հենց երկրորդ փուլի ընթացքում:
bbc-ն գրում է, որ ապրիլի 4-ին տեղի ունեցած բանավեճը թույլ տվեց 63-ամյա Ֆիյոնին կրճատել իր և առաջատար թեկնածուների միջև եղած տարբերությունը:
Ֆիյոնը ընտրությունների առաջատարն էր, քանի դեռ չէր հայտնվել «կեղծ աշխատատեղերի» սկանդալի կիզակետում: Նա մեղադրվում է իր հարազանտներին չկատարած աշխատանքի դիմաց հարյուր հազարավոր եվրոներ վճարելու մեջ:
Հարցումների արդյունքների համաձայն՝ նա երրորդն էր առաջին փուլում. այս տեմպերով նա կարող է դուրս մնալ ընտրապայքարից: