Եգիպտոսում տեղի ունեցած ահաբեկչություններն ավելի քան 40 մարդու կյանք են խլել

Ապրիլի 9-ին Եգիպտոսում երկու խոշոր ահաբեկչական գործողություն է իրականացվել: Մի քանի ժամվա տարբերությամբ ծայրահեղականները հարձակում են գործել Տանտա (Գարբիա նահանգ) և Ալեքսանդրիա քաղաքների երկու քրիտոնեական եկեղեցիների վրա: Առողջապահության նախարարության տվյալներով՝ ընդհանուր առմամբ կա 44 զոհ, որոնցից 27-ը՝ Տանտայում, 17-ը՝ Ալեքսնդրիայում. վիրավորվել է ավելի քան 100 մարդ: Այս մասին գրում է ՏԱՍՍ-ը:

Հատկանշական է, որ ահաբեկչական գործողությունը տեղի է ունեցել Ծաղկազարդի օրը, որը նշվում է ամբողջ քրիստոնյա աշխարհում: Տանտայի Սբ. Գևորգ եկեղեցում տեղի ունեցած պայթյունից հետո դրան հարող տարածքները շրջափակվել են: Անմիջապես ձերբակալվել են երկու մարդ, որոնք կասկածվում են ահաբեկչություն իրականացնելու մեջ:

Տանտայի ահաբեկչական գործողությունից հետո Եգիպտոսի ներքին գործերի նախարարի հրամանով աշխատանքից հեռացվել է Գարբիա նահանգի անվտանգության ծառայության պետը:

Հաջորդ հարձակումը կատարվել է Ալեքսանդրիայի Սբ. Մարկոս եկեղեցու վրա: Պայթյունի ժամանակ այնտեղ է գտնվել նաև Թավադրոս 2-րդ պատրիարքը, որը, բարեբախտաբար, չի վնասվել:

Ավելի ուշ տեղի համալսարանի մոտակայքում հայտնաբերվել և վնասազերծվել է ևս մեկ պայթուցիկ սարք:

Ահաբեկչական գործողությունների հետ կապված Կահիրեում և երկրի մյուս քաղաքներում ձեռնարկվել են անվտանգության միջոցառումներ: