Հալեպում տեղի ունեցած պայթյունի հետևանքով վեց մարդ է զոհվել

Հալեպում պայթյուն է տեղի ունեցել, որի արդյունքնում վեց մարդ է զոհել: Այս մասին հաղորդում է Reuters գործակալությունը՝ հղում կատարելով սիրիական աղբյուրներին:

Արտակարգ դեպքը տեղի է ունեցել Հալեպի Սալահ ադ-Դին թաղամասում, որը դեկտեմբերյան հարձակման ընթացքում ազատագրվել էր գրոհայինների ձեռքից՝ սիրիական բանակի ջանքերի շնորհիվ: Վերջին տվյալներով՝ պայթյունի հետևանքով 32 մարդ տարբեր աստիճանի մարմնական վնասվածքներ է ստացել: Այլ մանրամասներ դեռևս հայտնի չեն:

Ավելի վաղ՝ ապրիլի 15-ին, Հալեպի Ռաշիդին ծայրամասում մահապարտ ահաբեկիչը պայթեցրել էր իրեն շիական Ֆուա և Կեֆրայա (Իդլիբի շրջան) գյուղերից տարհանվող բնակչությամբ լցված ավտոբուսների կողքին: Ահաբեկիչը հաջողացրել էր ականապատ մեքենայով մոտենալ ավտոբուսներին՝ ներկայանալով որպես «փրկիչ»՝ սննդի պաշարով և նվերներով: Ավելի քան 130 մարդ էր զոհվել, այդ թվում նաև 68 երեխա: Ավտոբուսները, որոնք ավելի քան 5000 մարդ էին տեղափոխում, ուղևորվում էին դեպի Ջիբրին, որտեղ գտնվում է փախստականների ժամանակավոր կացարանը: