Ղրիմը պատմականորեն ռուսական տարածք է. Ֆրանսուա Ֆիյոն

«Ռուսաստանը երբեք չի թողնի Ղրիմը, որը պատմականորեն ռուսական տարածք է»,- կարծում է Ֆրանսիայի նախագահական ընտրություններում «Հանրապետական» կուսակցության թեկնածու, նախկին վարչապետ Ֆրանսուա Ֆիյոնը:

«Անօգուտ է համառել՝ ասելով, թե Ռուսաստանը պետք է հեռանա Ղրիմից. դա երբեք տեղի չի ունենա»,- «Ֆիգարո» թերթին տված հարցազրույցի ընթացքում ասել է Ֆիյոնը:

Նախագահի թեկնածուի խոսքերով՝ Ղրիմի հարցին մոտենալիս անհրաժեշտ է հաշվի առնել երկու հիմնական և իրարամերժ սկզբունք՝ սահմանների բաժանումը և ժողովուրդների ինքնորոշման իրավունքը:

Ֆիյոնի կարծիքով՝ Ղրիմի հարցը կարող է կարգավորվել ՄԱԿ-ի հովանու ներքո կազմակերպված հատուկ միջազգային համաժողովի միջոցով:

Ավելի վաղ՝ նախընտրական բանավեճերի ընթացքում, Մոսկվայի հետ հարաբերությունները քննարկելիս նախագահի թեկնածուներն անդրադարձել են Ղրիմի հարցին: Այդ ժամանակ հենց Ֆրանսուա Ֆիյոնն էր, որ հօգուտ Ռուսաստանի առաջ քաշեց ժողովրդի ինքնորոշման փաստարկը:

Հիշեցնենք, որ Ղրիմը Ռուսաստանի շրջանը դարձավ 2014 թ. մարտին այնտեղ անցկացված հանրաքվեի համաձայն, որի արդյունքում ղրիմցիների 96,77%-ը կողմ  քվեարկեց ՌԴ կազմի մեջ մտնելուն: Քվեարկությունն անցկացվել էր Ուկրաինայի պետական հեղաշրջումից հետո: Կիևը թերակղզին համարում է ժամանակավորապես զավթված տարածք, որը դեռևս իրեն է պատկանում: Ի պատասխան՝ Ռուսաստանի կառավարությունը բազմիցս հայտարարել է, որ Ղրիմի քաղաքացիները քվեարկել են Ռուսաստանի հետ վերամիավորման օգտին, որը միանգամայն համապատասխանում է միջազգային իրավունքին և ՄԱԿ-ի կանոնադրությանը: