Փարիզում ահաբեկչություն է տեղի ունեցել նախագահական ընտրությունների նախօրեին

Այսօր՝ ապրիլի 21-ին՝ Ֆրանսիայի նախագահական ընտրություններից ընդամենը 3 օր առաջ, Փարիզի կետրոնական Ելիսեյան դաշտեր կոչվող վայրում փոխհրաձգություն է տեղի ունեցել: Ֆրանսիայի ներքին գործերի նախարար Պիեր-Անրի Բրանդեի տեղեկացմամբ՝ պատահարի արդյունքում մեկ ոստիկան է զոհվել, երկուսը՝ ստացել են մարմնական վնասվածքներ. կրակոցների արդյունքում տուժել է նաև մեկ օտարերկրյա քաղաքացի: Այս մասին հաղորդում է France-Presse լրատվական գործակալությունը:

«Հարձակումն իրականացնողը մեքենայով մոտեցել է հերթապահ պարեկային անձնակազմին, դուրս է եկել մեքենայից և կրակ բացել ոստիկանության աշխատակիցների ուղղությամբ: Այս ամենից հետո թողել է իր մեքենան և փախուստի դիմել, սակայն արդյունքում սպանվել է», - տեղեկացրել է Ֆրանսիայի ներքին գործերի նախարարը:

Ենթադրվում է, որ հարձակումն իրականացրած անձը «Իսլամական պետություն» ահաբեկչական խմբավորման կողմնակիցներից է:

«Հետաքննությանը հարող աղբյուրների համաձայն՝ սպանվածի մոտ Իսլամական պետությունը պաշտպանող մի երկտող է հայտնաբերվել»,- ասվում է գործակալության արած հայտարարության մեջ:

Կատարվածից մի քանի ժամ անց տեղեկություն է ստացվել, որ հարձակման պատասխանատվությունն արդեն ստանձնել է «Իսլամական պետությունը» ահաբեկչական խմբավորումը: Ծայրահեղականները հայտել են, որ ահաբեկիչը Բելգիայից ժամանած Աբու Յուսեֆ ալ-Բելջիկին է: Այս տեղեկատվությունն առայժմ պաշտոնապես չի հաստատվել Փարիզի կողմից, սակայն մի շարք ֆրանսիական լրատվամիջոցներ տեղեկացնում են, որ  հետաքննության համաձայն՝ հարձակվողը ֆրանսիական հատուկ ծառայություններին քաջ հայտնի է ահաբեկչական կապերի պատճառով: