Մակրոնը և Լը Պենն անցնում են երկրորդ փուլ

Ֆրանսիայի էկոնոմիկայի նախկին նախարար Էմանուել Մակրոնը և «Ազգային ճակատ» կուսակցության առաջնորդ Մարին Լը Պենը, հավաքելով, համապատասխանաբար, 23,75% և 21,53% ձայն, դուրս են եկել նախագահական ընտրությունների երկրորդ փուլ։ Այս մասին հայտնում է «Ռոյթերս» լրատվական գործակալությունը՝ հղում կատարելով Ֆրանսիայի ներքին գործերի նախարարության հայտնած տվյալներին։

Երկրի նախկին վարչապետ Ֆրանսուա Ֆիյոնը հավաքել է ընտրողների 19,91% ձայները։ Ձախակողմյան քաղաքական կողմնորոշում ունեցող հայտնի գործիչ, եվրապատգամավոր Ժան-Լյուկ Մելանշոնը հավաքել է ձայների 19,64%-ը։ Վերջին երկուսը դուրս են մնում պայքարից։

Ֆրանսիայի նախագահական ընտրությունների երկրորդ փուլը կայանալու է մայիսի 7-ին։ Առաջին փուլում ամենաշատ ձայներ ստացած Էմանուել Մակրոնի նախընտրական շտաբից հայտարարել են, որ պատրաստ են սկսել երկրորդ փուլին նախապատրաստվել հենց այսօրվանից՝ ապրիլի 24-ից։ Մակրոնը կարծում է, որ Լը Պենի հետ պայքարը շատ լարված է լինելու։

Հետազոտություններ անցկացնող «Իփսոս» կազմակերպության ուսումնասիրությունը ցույց է տալիս, որ մայիսի 7-ին կայանալիք երկրորդ փուլում ձայների 62%-38%-ի հարաբերակցությամբ կհաղթի Մակրոնը։

Ֆրանսիայում նախագահական ընտրություններն անցկացվում են 11-րդ անգամ։ Գործող նախագահ Ֆրանսուա Օլանդից առաջ երկրի ղեկավարի պաշտոնին եղել են՝ Նիկոլա Սարկոզին, Ժակ Շիրակը, Ֆրանսուա Միտերանը, Վալերի Ժիսկար դ՛Էստենը, Ժորժ Պոմպիդուն և Շառլ դը Գոլը։