Անկարգություններ Փարիզում. 143 ցուցարար ձերբակալվել է
Փարիզի իրավապահ մարմինները նախորդ գիշեր 143 մարդ են ձերբակալել Բաստիլիա հրապարակում, որտեղ չթույլատրված հավաք է անցկացվել «Ազգային ճակատ» կուսակցության առաջնորդ Մարին Լը Պենի դեմ: Այս մասին տեղեկացնում է Փարիզի ոստիկանությունը:
Իրավապահների արած հայտարարության համաձայն՝ անկարգությունների ընթացքում տուժել է վեց ոստիկան և երեք ցուցարար, ներկա պահին դեռևս ձերբակալված է 29 մարդ: Ցույցն անցկացվել է այսպես կոչված «հակաֆաշիստական» և «հակակապիտալիստական» խմբավորումների կողմից:
Հիշեցնենք, որ ընտրության առաջին փուլի արդյունքների հայտարարումից հետո Փարիզի կենտրոնական հրապարակ էին դուրս եկել ավելի քան 300 ցուցարարներ: Ընդ որում՝ նրանք սոցիալական կայքերի միջոցով կոչ էին արել Փարիզում «բարիկադների գիշեր» անցկացնել:
Ցուցարարները քարեր, շշեր և տարբեր առարկաներ են նետել դեպքի վայր ժամանած իրավապահ մարմինների աշխատակիցների վրա: Փարիզի գլխավոր հրապարակի արևելյան հատվածի երթևեկությունը ժամանակավորապես դադարեցվել էր: Ոստիկաններին հաջողել է ցուցարարներին հեռացնել հրապարակից, որոնք, սակայն, շարունակել են անկարգություններ անել հարևան փողոցներում՝ այրելով հինգ ավտոմեքենա:
Ցուցարարների մի մասը բողոքել է նաև ընտրությունների առաջին փուլում հաղթած Էմանուել Մակրոնի դեմ՝ նրան անվանելով «բանկերի և մեծ ունեցվածքի ներկայացուցիչ»: