Ի՞նչ ազդեցություն կունենա Ֆրանսիայի նախագահական ընտրությունը «Բրեքզիթի» վրա

Էմանուել Մակրոնը Ֆրանսիայի հաջորդ նախագահի ամենահավանական թեկնածուն է. բայց ի՞նչ ազդեցություն դա կարող է ունենալ բիզնեսի և «Բրեքզիթի» վրա։

BBC-ի տնտեսական վերլուծաբան Սիմոն Ջեքը գրում է, որ ընդհանուր տնտեսական տեսանկյունից Մակրոնի հաղթանակը կչեզոքացնի Եվրոպայի հիմնական քաղաքական և տնտեսական ցնցման հավանականությունը:

Եվրամիությունից դուրս գալու Մարին Լը Պենի կոչը էական սպառնալիք է համարվում ամբողջ Եվրոպայի համար:

Որոշ վերլուծաբաններ կարծում են, որ Մակրոնի՝ բիզնեսի համար նպատակահարմար քաղաքականությունը, ինչպես օրինակ՝ համընդհանուր հարկի նվազեցումը 33%-ից մինչև 25%-ի, Ֆրանսիան ավելի գրավիչ կդարձնի եվրոպական բիզնես նախագծերի համար:

Մակրոնի հաղթանակը երկու կարևոր ազդեցություն կունենա «Բրեքզիթի» բանակցությունների վրա:

Նախ և առաջ հարկերի կրճատում և աշխատողների իրավունքների նվազեցում կատարելու համար Մարկոնը պետք է նոր կառավորություն ձևավորի, և ամենայն հավանականությամբ կունենա ֆրանսիացի սոցիալիստների աջակցության կարիքը, որոնք շաբաթական 32-ժամյա աշխատանքի կողմնակից են:

Վերլուծաբանի կարծիքով՝ Ֆրանսիան բիզնեսի համար ավելի գրավիչ դարձնելու Մակրոնի փորձերը կհանգեցնեն քաղաքական կոալիցիայի ձևավորմանը: Ինչպես հայտնի է ֆրանսիական աշխատաշուկան այս կերպ ձևափոխելու ոչ մի փորձ դեռևս չի հաջողվել:

Երկրորդը Եվրոպայի անվտանգության հիմնահարցն է:

Մեծ Բրիտանիայի՝ ԵՄ-ից դուրս գալը հակաեվրոպական տրամադրություն էր ստեղծել ամբողջ տարածաշրջանում, որը աստիճանաբար կհանդարտվի Մակրոնի հաղթանակից հետո: