Ռուսաստանը և Ճապոնիան կոչ են անում խաղաղ ճանապարհով լուծել Հյուսիսային Կորեայի խնդիրը

ՌԴ նախագահ Վլադիմիր Պուտինը և Ճապոնիայի վարչապետ Սինձո Աբեն անհանգստացած են Կորեական թերակղզու հետ կապված իրավիճակի վատթարացմամբ: Այս մասին հայտնում է ՏԱՍՍ-ը:

«Կոչ ենք անում տարածաշրջանային հարցերում ներգրավված բոլոր երկրներին զերծ մնալ թշնամական հռետորաբանությունից և ձգտել խաղաղ, կառուցողական երկխոսությունների ամրապնդմանը», - հայտարարել է ՌԴ նախագահը՝ հավելելով, որ ընդհանուր խնդիրը կարող է լուծվել վեցակողմ (Հս. Կորեա, Չինաստան, ԱՄՆ, Ռուսաստան, Հվ. Կորեա և Ճապոնիա) բանակցությունների վերսկսմամբ:

«Բանակցությունների ընթացքում մենք զրուցել ենք նաև միջազգային խնդիրների մասին: Քննարկվել են միջազգային կազմակերպությունների, ինչպես օրինակ ՄԱԿ-ի կամ ՄԱԿ-ի Անվտանգության խորհրդի հետ համագործակցությունը, որում Ճապոնիան դեռևս մշտական անդամ չէ», - ռուս-ճապոնական բանակցությունների մասին խոսելով՝ շարունակել է Պուտինը:

Իր հերթին Սինձո Աբեն հայտարարել է, որ Ռուսաստանը և Ճապոնիան կշարունակեն պնդել, որ Հս. Կորեան հետևի ՄԱԿ-ի Անտանգության խորհրդի՝ միջուկային զենքի նախագծման արգելքի վերաբերյալ բանաձևին: «Ես և նախագահ Պուտինը կարծում ենք, որ Ճապոնիան և Ռուսաստանը կշարունակեն հետագա համագործակցությունը Հս. Կորեայի խնդրի շուրջ»,- նշել է վարչապետը: