Բաշկորտոստանում ուղղաթիռի վթարի հետևանքով երեք մարդ է զոհվել

Բաշկորտոստանում ուղղաթիռի վթարի հետևանքով երեք մարդ է զոհվել, նրանցից մեկը «Light Air» ավիաընկերության օդաչու էր: Այս մասին ՏԱՍՍ պարբերականին հայտնել է տրանսպորտային դատախազության պետի տեղակալ Մայա Իվանովան:

Արտակարգ իրավիճակների ծառայություններից տեղեկացրել են, որ փրկարարները զոհվածների մարմինները հայտնաբերել են ուղղաթիռի անկման վայրում՝ Բաշկորտոստանի Բելորեցկ շրջանում:

«Ուղղաթիռի անկման վայրում հայտնաբերվել են բոլոր երեք ուղևորների մարմինները, այդ թվում օդաչուն և անտառային տնտեսության երկու աշխատակից: Վերջիններս անտառային հրդեհների իրավիճակի վերաբերյալ մոնիթորինգ էին անցկացնում»,- տեղեկացնում է ՏԱՍՍ գործակալության զրուցակիցը: 

Ուղղաթիռը պատկանում է «Light Air» ավիաընկերությանը: Ուղղաթիռի անհետացման մասին հաղորդումը ստացվել է 14:20: Այն թռչել է Ուֆայից դեպի Բելորեցկ. ուղղաթիռի փրկարար ազդանշանն արձանագրվել էր արբանյակային փրկարար որոնողական համակարգի կողմից: Պրիվոլժսկի քննչական վարչության տրանսպորտի կոմիտեն հետաքննություն է սկսել միջադեպի առիթով: