ԵՄ խորհուրդը հաստատել է առանց մուտքի արտոնագրի ռեժիմն Ուկրաինայի համար

ԵՄ խորհուրդը այսօր՝ մայիսի 11-ին, հաստատել է Ուկրաինայի համար  առանց մուտքի արտոնագրի ռեժիմ սահմանելու առաջարկը: Այս մասին հայտնում է կառույցի մամուլի ծառայությունը:

Այդուհանդերձ Բրյուսելը խոստացել է դադարեցնել գործընթացը, եթե Ուկրաինայում «լուրջ խնդիրներ» առաջանան կապված միգրացիայի և անվտանգության հետ:

Այժմ ԵՄ խորհրդի որոշումը պետք է ստորագրեն Եվրոպական խորհրդարանի նախագահ Անտոնիո Տայանին և ԵՄ խորհուրդը նախագահող Մալթայի վարչապետ Ջոզեֆ Մուսկաթը: Ապա որոշումը կհրապարակվի Եվրամիության պաշտոնական լրագրում, և 20 օր անց առանց մուտքի արտոնագրի ռեժիմը կմտնի ուժի մեջ:

Ինչպես նշել է Ուկրաինայի վարչապետ Վլադիմիր Գրոյսմանը, ուկրաինացիները կկարողանան առանց մուտքի արտոնագրի Եվրամիություն մուտք գործել հունիսի 11-ից: Նա ԵՄ-ի այս որոշումը համեմատել է Բեռլինի պատի անկման հետ:

ՌԴ արտաքին գործերի նախարարությունում Բրյուսելի որոշումն անվանել են «խայծ, որը փոքր-ինչ կթեթևացնի գործող համակարգը»:

Ուկրաինայի քաղաքացիները կարող են շենգենյան գոտու երկրներում գտնվել կես տարվա ընթացքում 90 օրից ոչ ավել: Առանց մուտքի արտոնագրի ռեժիմը Եվրամիության երկրներում աշխատելու թույլտվություն չի տալիս: Կարճաժամկետ այցի նպատակը կարող է լինել զբոսաշրջությունը, բիզնեսը, մշակութային միջոցառումներին մասնակցությունը և այլն։