Ռուսական ՀՕՊ համակարգերը ամերիկյան հետախուզական թռչող սարք են նկատել Սև ծովի երկնքում

Ռուսական հակաօդային պաշտպանության հսկող սարքերը Սև ծովի երկնքում նկատել են ամերիկյան հետախուզական RQ-4 Global Hawk տեսակի անօդաչու թռչող սարք։ Այս մասին հայտում է ՏԱՍՍ-ը՝ հղում կատարելով ռազմական աղբյուրներին։

«Երեկ՝ մայիսի 12-ին, Սև ծովի օդային տարածքում նկատվել է ամերիկյան ռազմավարական հետախուզական Global Hawk անօդաչու սարքը, որը թռչել է մեծ բարձրության վրա՝ շարժվելով դեպի Ռուսաստանի սահմանները», - ասել է ՌԴ պաշտպանական գերատեսչության ներկայացուցիչը։

Աղբյուրը նշում է նաև, որ ամերիկյան ինքնաթիռները պարբերաբար կատարում են այսպիսի թռիչքներ։

Հիշեցնենք, որ նմանատիպ դեպք տեղի էր ունեցել նաև մայիսի 9-ին։ Ռուսական Սու-30 կործանիչն օդ էր բարձրացել՝ նկատելով որ Ռուսաստանի սահմաններին է մոտենում ամերիկյան «Փոսեյդոն» հետախուզական ինքնաթիռը։ Վերջինս փոխել էր թռիչքի ուղղությունը՝ նկատելով մոտեցող կործանիչը։

Նշենք, որ ամերիկյան RQ-4 Global Hawk անօդաչու թռչող սարքը կարող է զարգացնել մինչև 800 կմ/ժ արագություն և թռիչքներ կատարել մինչև 20 կիլոմետր բարձրության վրա։