Մակրոնը վարչապետ է նշանակել հանրապետական Էդուարդ Ֆիլիպին

Ֆրանսիայի նորընտիր նախագահ Էմանուել Մակրոնը երկրի վարչապետ է նշանակել աջ կենտրոնամետ հանրապետական կուսակցության անդամ Էդուարդ Ֆիլիպին: Այս մասին տեղեկացնում է BBC-ն:

«Այս ընտրությամբ Մակրոնը ցույց տվեց, որ ցանկանում է իր կողմը գրավել ֆրանսիական քաղաքականության աջակողմյան և ձախակողմյան կուսակցությունների գլխավոր ներկայացուցիչներին», - գրում է լրատվականը:

BBC-ի փոխանցմամբ՝ նորանշանակ վարչապետը հյուսիսային նավահանգստային Լե Հավր քաղաքի քաղաքապետն էր: Նա նաև 2016 թ. նոյեմբերին հանրապետական կուսակցության կողմից առաջադրված թեկնածու Ալեն Ժուպեի մտերիմն է:

Հաջորդ ամիս նախագահ Մակրոնին խորհրդարանական վճռական ընտրություններ են սպասվում, և նա կունենա կետրոնամետ կուսակցության աջակցության կարիքն իր տնտեսական բարեփոխումներն իրականացնելու համար:

Հիշեցնենք, որ 39-ամյա նախկին գործարար և էկոնոմիկայի նախարար Մակրոնի երդմնակալության արարողությունը տեղի ունեցավ մայիսի 14-ին Ելիսեյան պալատում:

Մակրոնի նորաստեղծ «Շարժվող հանրապետություն» (La République en Marche) կուսակցությունն անցյալ շաբաթ 428 թեկնածուներից կազմված ցուցակ է ներկայացրել հունիսին կայանալիք ընտրությունների համար. թեկնածուների 50%-ը կանայք են:

BBC-ի տեղեկացմամբ՝ առաջիկայում Մակրոնին սպասվող ամենակարևոր իրադարձությունը կանցլեր Մերկելի հետ Բեռնիլում կայանալիք հանդիպումն է։