Մարիա Զախարովան հասցեական հայտարարությամբ է հանդես եկել արցախա-ադրբեջանական սահմանին վերջին օրերի լարվածության վերաբերյալ
«Ռուսաստանը՝ որպես Լեռնայի Ղարաբաղի հակամարտության կարգավորման միջնորդ, դատապարտում է հրադադարի ռեժիմի խախտումը և կողմերին կոչ է անում ձեռնարկել բոլոր անհրաժեշտ քայլերը՝ հակամարտության գոտում լարվածությունը նվազեցնելու համար», - հայտարարել է ՌԴ արտաքին գործերի նախարարության պաշտոնական ներկայացուցիչ Մարիյա Զախարովան:
Պատասխանելով այն հարցին, թե արդյոք եռակողմ հանդիպում սպասվում է ՌԴ-ի, Ադրբեջանի և Հայաստանի արտգործնախարարների միջև՝ հաշվի առնելով վերջին օրերին արցախա-ադրբեջանական սահմանին տիրող լարվածությունը՝ Զախարովան ասել է, որ դեռևս ոչինչ չի պատրաստվում հայտարարել:
«Տարբեր աղբյուրների համաձայն՝ մայիսի 15-ին ադրբեջանական կողմից շփման գծի հակառակ կողմում գտնվող զինվորական օբյեկտ է գնդակոծվել: Հակառակ կողմը համապատասխան արձագանք է տվել: Ռազմական օբյեկտի վերաբերյալ տեղեկությունները, վնասի չափը և զոհերի առկայության մասին տվյալները հակասական են»,- ասել է Զախարովան։
Հիշեցնենք, որ մայիսի 15-ին՝ ժամը 16:30-ի սահմաններում, արցախա-ադրբեջանական սահմանի արևելյան ուղղությամբ հակառակորդը կառավարվող հրթիռից կրակ էր բացել պաշտպանության բանակի ռազմական օբյեկտի ուղղությամբ, ինչի արդյունքում մասնակի վնասվել էր մեկ ռազմական տեխնիկա: Հայկական կողմը դիմել էր պատասխան գործողությունների, ինչի արդյունքում, ըստ ՊԲ համապատասխան ծառայությունների տրամադրության տակ եղած հավաստի տվյալների, ադրբեջանական կողմը կրել էր կորուստներ: