Ադրբեջանական զինուժը կրակ է վարել սեփական դիրքերի ուղղությամբ (տեսանյութ)

Այսօր՝ մայիսի 19-ին, Ադրբեջանի Զինված ուժերը, փորձելով դիմել հերթական սադրիչ գործողություններին, կրակ են վարել սեփական դիրքերի ուղղությամբ։ Այս մասին հայտնում է Լեռնային Ղարաբաղի Հանրապետության ՊԲ մամուլի ծառայությունը։

«ՊԲ առաջնագծում տեղադրված տեսադիտարկվող համակարգերն արձանագրել են, որ ժամը 12:15-12:19-ի և 13:32-13:36-ի սահմաններում շփման գծի Սեյսուլան-Յարըմջա հատվածում հակառակորդը, նախնական տվյալներով, 60 միլիմետրանոց ականանետերից կրակ է վարել իր իսկ դիրքերի ուղղությամբ, ինչի հետևանքով նշված հատվածներում տեղի են ունեցել պայթյուններ: Նշվածը ևս մեկ անգամ ապացուցում է, որ հակառակորդի ճամբարում կամ անձնակազմը չի տիրապետում իր մասնագիտական պարտականություններին, կամ բացակայում է ուղղահայաց կառավարումը և ցանկացած հրամանատար առաջնագծում իրեն թույլ է տալիս գործողություն իրականացնելու որոշում ընդունել կամ էլ հակառակ դեպքում նման ստոր քայլերով Ադրբեջանի ռազմաքաղաքական ղեկավարությունը հող է նախապատրաստում իր հետագա սադրանքների համար», - գրում է Արցախի պաշտպանությաննախարարության պաշտոնական կայքը (nkrmil.am):

Նշվում է նաև, որ հայկական կողմը հավատարիմ է մնացել հրադադարի պահպանման ռեժիմին և որևէ գործողություն, առավել ևս խոշոր տրամաչափի զինատեսակներից, չի իրականացրել։