Սերժ Սարգսյանը շնորհավորական ուղերձ է հղել Հասան Ռոհանիին
Հայաստանի Հանրապետության նախագահ Սերժ Սարգսյանը շնորհավորական ուղերձ է հղել Հասան Ռոհանիին Իրանի Իսլամական Հանրապետության նախագահի պաշտոնին վերընտրվելու կապակցությամբ։ Այս մասին հայտնում է ՀՀ նախագահի մամուլի ծառայությունը։
«Վստահ եմ, որ Ձեր հետագա պաշտոնավարման ընթացքում բարեկամ և հարևան Իրանը կշարունակի իր վերընթաց զարգացման ուղին՝ կարևոր և նշանակալի ներդրում ունենալով տարածաշրջանային խաղաղության և կայունության հաստատման գործում:
Լիահույս եմ, որ մեր համատեղ ջանքերի շնորհիվ հայ-իրանական ավանդական ջերմ և բարեկամական հարաբերությունները կշարունակեն զարգանալ և ամրապնդվել բոլոր բնագավառներում՝ արձանագրելով մեր ժողովուրդների միջև փոխգործակցության որակական նոր մակարդակ:
Մաղթում եմ Ձեզ քաջառողջություն, նորանոր հաջողություններ Ձեր նախաձեռնություններում, իսկ Իրանի բարեկամ ժողովրդին` հարատև խաղաղություն և բարօրություն», - ասվում է Սերժ Սարգսյանի շնորհավորական ուղերձում։
Հիշեցնենք, որ Իրանի գործող նախագահ Հասան Ռոհանին համոզիչ հաղթանակ էր տարել մայիսի 19-ին անցկացված նախագահական ընտրություններում՝ հավաքելով ձայների 57%-ը։