Կանադայի վարչապետը չի պատասխանել Թրամփի նկատմամբ վստահություն ունենալու մասին հարցին
Կանադայի վարչապետ Ջասթին Թրյուդոն չի պատասխանել հարցին, թե արդյոք վստահում է ԱՄՆ նախագահ Դոնալդ Թրամփին, երբ վերջինիս հասցեին Մեծ Բրիտանիայի կողմից մեղադրանքներ հնչեցին Մանչեսթրի ահաբեկչական գործողության հետաքննության տվյալների տարածման վերաբերյալ։ Այս մասին լրագրողները Կանադայի վարչապետին հարցրել էին ՆԱՏՕ-ի գագաթնաժողովի բացումից առաջ կայացած ճեպազրույցի ընթացքում։
ՏԱՍՍ-ի փոխանցմամբ՝ ավելի վաղ Մեծ Բրիտանիայի վարչապետ Թերեզա Մեյը հայտարարել էր, թե պատրաստվում է ԱՄՆ-ի նախագահին հասկացնել, որ այն հետախուզական տվյալները, որոնցով փոխանակվում են Լոնդոնը և Վաշինգտոնը, չպետք է հրապարակվեն։ Այս մասին նա հայտնել է COBRA կառավարական հանձնաժողովի արտակարգ նիստի ամփոփման ընթացքում։
Ինչպես ավելի վաղ տեղեկացրել է Reuters գործակալությունը, բրիտանական ոստիկանությունը հաստատել էր ԱՄՆ-ի հետ Մանչեսթրի ահաբեկչության հետաքննության տվյալների փոխանակումը դադարեցնելու մասին տեղեկատվությունը։ «Դա կշարունակվի այնքան ժամանակ, մինչև մենք համոզվենք, որ այլևս տեղեկատվության չարտոնված արտահոսք տեղի չի ունենա»,- նշել է գործակալության զրուցակիցը։
Հիշեցնենք, որ Մեծ Բրիտանիան դադարեցրել էր ԱՄՆ-ին տեղեկատվության տրամադրումն այն բանից հետո, երբ ամերիկյան New York Times թերթը հրապարակել էր Մանչեսթրի համերգային համալիրում գործարկված պայթուցիկ սարքի մանրամասն պատկերները։ Պայթյունի հետևանքով զոհվել էր 22 մարդ, վիրավորվել՝ 64-ը