Եգիպտոսում քրիստոնյաների ավտոբուսների վրա կատարված հարձակման արդյունքում 26 մարդ է զոհվել (տեսանյութ)
Եգիպտական Էլ-Մինյա նահանգից ոչ հեռու գտնվող սուրբ Սամուելի մենաստանից քրիստոնյա ուխտավորներին տեղփոխող ավտոբուսների վրա բացված կրակահերթերի հետևանքով ավելի քան 26 մարդ է զոհվել, 30-ը ստացել են տարբեր աստիճանի մարմնական վնասվածքներ: Այս մասին տեղեկացրել է Եգիպտոսի առողջապահության նախարարությունը:
Ալ-Ահրամ տեղեկատվական գործակալության տվյաներով՝ զոհվածների մեծ մասը երեխաներ են: Աղբյուրի փոխանցմամբ՝ ավտոբուսներից մեկում 40 երեխա է եղել, իսկ մյուսում մեծահասակներ:
Արդեն հայտնի է, որ գրոհայինները կրակ են բացել ավտոբուսների վրա երկու ամենագնացներից: Ենթադրվում է, որ հարձակմանը մասնակցել է ավելի քան տասը դիմակավորված ահաբեկիչ: Ոստիկանությունը զբաղվում է նրանց որոնողական աշխատանքներով, իսկ դեպքի վայրը շրջապատված է ներքին գործերի նախարարության հատուկ նշանակության ջոկատներով:
Վերջին կես տարվա ընթացքում Եգիպտոսում մի քանի խոշոր հարձակումներ են տեղի ունեցել, որոնց թիրախը քրիստոնյաներն են եղել: Ապրիլի սկզբին Տանտա և Ալեքսանդիա քաղաքների քրիստոնեական տաճարներում տեղի ունեցած ահաբեկչական գործողությունների արդյունքում ավելի քան 45 մարդ էր զոհվել, իսկ 100-ից ավելին վիրավորվել էին: Այդ ահաբեկչությունների պատասխանատվությունն ստանձնել էր Իսլամական պետությունը: