Վրաստանը որոշել է դառնալ ՆԱՏՕ-ի անդամ

Վրաստանը որոշել է դառնալ Հյուսիսատլանտյան դաշինքի անդամ։ Այս մասին ՆԱՏՕ-ի խորհրդարանական վեհաժողովի լիագումար նիստում ունեցած ելույթի ժամանակ հայտարարել է երկրի վարչապետ Գիորգի Կվիրիկաշվիլին։

«Վերջին տարիներին Վրաստանի և ՆԱՏՕ-ի ակտիվ համագործակցությունը հասել է բարձրագույն մակարդակի։ Վրաստանը հստակ որոշել է դառնալ ՆԱՏՕ-ի անդամ, և մենք ակտիվորեն շարունակում ենք ինտեգրման գործընթացը՝ ավելացնելով բարեփոխումներն այդ ուղղությամբ», - ասել է Վրաստանի վարչապետը։

ՆԱՏՕ-ի խորհրդարանական վեհաժողովը անցկացվում է Թբիլիսիում՝ մայիսի 26-ից 29-ը։ Դրան մասնակցում է ավելի քան 600 պատվիրակ ՆԱՏՕ-ի անդամ 28 երկրներից, ինչպես նաև Դաշինքի հետ համագործակցող ավելի քան 20 երկրների ներկայացուցիչներ։

Մայիսի 26-ից 28-ն անցկացվել են ՆԱՏՕ-ի խորհրդարանական վեհաժողովի հանձնաժողովների լսումները։ Այսօր՝ մայիսի 29-ին, պլենար նիստի ժամանակ նախատեսվում է ընդունել Վրաստանի եվրաատլանտյան ինտեգրացիային աջակցություն հայտնող հռչակագիր։