ԵՄ-ի առաջատար երկրների ղեկավարներն արձագանքել են Թրամփի որոշմանը
Ֆրանսիան, Գերմանիան և Իտալիան Եվրամիության ղեկավարության հետ միասին իրենց ափսոսաքն են հայտնել փարիզյան համաձայնագրից դուրս գալու ԱՄՆ նախագահ Դոնալդ Թրամփի որոշման կապակցությամբ. գրում է lenta.ru-ն:
«Փարիզյան համաձայնագիրը մնում է մեր երկրների միջև համագործակցության հիմնաքարը, որը նպաստում է կլիմայական խնդիրների արդյունավետ լուծմանը և մինչև 2030 թ. սահմանված նպատակների կայուն զարգացմանը»,- նշվում է հայտարարության մեջ:
«Մենք հավատացած ենք, որ փարիզյան համաձայնագրի իրականացումը նշանակալից տնտեսական հնարավորություններ է տալիս անդամ երկրներին, ինչպես նաև ամբողջ աշխարհին»,- ասվում է փաստաթղթում:
Փարիզյան համաձայնագրից դուրս գալու որոշման մասին հայտարարելուց հետո նախագահ Թրամփը հեռախոսազրույց է ունեցել Գերմանիայի կանցլեր Անգելա Մերկելի հետ, որի ընթացքում վերջինս իր ափսոսանքն է հայտնել: Այս մասին թվիթերյան իր էջում գրում է գերմանական կառավարության մամլո քարտուղար Շտեֆան Զայբերթը:
«Ռոյթերս»-ի փոխանցմամբ՝ Ֆրանսիայի նախագահ Էմանուել Մակրոնն այս առիթով նշելէ, թե ԱՄՆ-ն թիկունք է դարձրել աշխարհին, մինչդեռ Ֆրանսիան ԱՄՆ-ին թիկունք չի դարձրել:
Նշենք, որ հունիսի 1-ին Թրամփը հայտարարել էր միջազգային կլիմայական կազմակերպությունից ԱՄՆ-ի դուրս գալու մասին: Նրա կարծիքով՝ դրան անդամակցելը շահավետ չէ ԱՄՆ-ի համար։ Նախագահն ասել է, որ ԱՄՆ-ն կա՛մ նորից բանակցություններ կսկսի փարիզյան համաձայնագրին վերամիավորվելու համար, կա՛մ «նոր, ԱՄՆ-ի համար արդար պայմաններով գործարքի կնքման համար, որը շահավետ կլինի ամերիկացի ձեռնարկատերերի, աշխատողների, մարդկանց և հարկատուների համար»:
Հայտարարությունն անելուց հետո Թրամփը բացի Մերկելից հեռախոսազրույց է ունեցել նաև, Մակրոնի, ինչպես նաև Կանադայի վարչապետ Ջասթին Թրյուդոյի և Մեծ Բրիտանիայի վարչապետ Թերեզա Մեյի հետ, որպեսզի բացատրի իր որոշման պատճառները: Բոլոր պաշտոնյաներն իրենց հիասթափությունն են հայտնել նախագահի որոշման առիթով: