Աշխարհի խոշորագույն տեխնոլոգիական ընկերությունների արաձագանքը Փարիզի համաձայնագրից դուրս գալու Թրամփի որոշմանը

25 խոշորագույն տեխնոլոգիական ընկերություններ, այդ թվում՝ Adobe-ը, Apple-ը, Google-ը, Facebook-ը, HPE-ը, Intel-ը և Microsoft-ը բաց նամակ էին գրել ԱՄՆ նախագահ Դոնալդ Թրամփին՝ խնդրելով դուրս չգալ Փարիզյան համաձայնագրից: «Կլիմայական համաձայնագրին ԱՄՆ-ի անդամակցությունը շահավետ է ամերիկյան բիզնեսի և տնտեսության համար»,- ասվում էր նամակում:

Ինչպես նշում է Internatioal Business Times-ը, Թրամփն արհամարհեց շատերի զգուշացումները և հունիսի 1-ին Սպիտակ տան առաջ ունեցած ելույթի ժամանակ հայտարարեց, որ ԱՄՆ-ն դուրս է գալիս Փարզյան համաձայնագրից:

Տեխնոլոգիական հսկաների ղեկավարներն անմիջապես դատապարտող հայտարարություններով հանդես եկան:

«Ես գիտեմ, որ շատերն են կիսում իմ հիասթափությունը Փարիզյան համաձայնագրից դուրս գալու Սպիտակ տան որոշման հետ կապված: Մինչ այդ ես խոսակցություն ունեցա նախագահ Թրամփի հետ և փորձեցի համոզել նրան մնալ համաձայնագրում: Բայց դա բավական չեղավ»,- թվիթերյան իր էջում գրել է  Apple-ի գործադիր տնօրեն Թիմ Քուքը:

Microsoft-ի նախագահ Բրեդ Սմիթը LinkedIn-ի իր էջում հրապարակել է հետևյալ հայտարարությունը. «Փարիզի համաձայնագիրը նոր շուկաներ է ստեղծում նորագույն մաքուր տեխնոլոգիաների համար: Այն նվազեցնում է հետագա կլիմայական վնասները մարդկանց և համաշխարհային կազմակերպությունների համար: Մենք հիասթափված ենք Սպիտակ տան կայացրած որոշման առիթով»:

Ի տարբերություն իր մրցակիցների՝ IBM տեխնոլոգիական ընկերությունը որոշել էր մնալ Թրամփի վարչակազմի կողմում: Սակայն այժմ նա նույնպես քննադատել է համաձայնագրից դուրս գալու որոշումը՝ ասելով. «Կլիմայի փոփոխությունը միջազգային խնդիր է, որը միջազգային լուծում է պահանջում. մենք հավատում ենք, որ աշխարհի համար կարևոր է ջերմոցային գազերի կրճատումը: Այդ պատճառով էլ IBM-ը կողմնակից է Փարիզյան համաձայնագրին անդամակցելուն»:

«Փարիզի համաձայնագրից դուրս գալը վատ է շրջակա միջավայրի, ինչպես նաև տնտեսության համար. այն վտանգի է ենթարկում մեր երեխաների ապագան»,- նշել է Facebook-ի հիմնադիր Մարկ Ցուկերբերգը:

Google ընկերության գլխավոր տնօրեն Սունդար Պիչաին  նույնպես դատապարտել է Թրամփի որոշումը՝ ասելով, որ հիասթափված է նրա որոշումից, և հավելել. «Google-ը կշարունակի քրտնաջան աշխատել ավելի մաքուր և բարգավաճ ապագա ստեղծելու համար»: