Մի շարք արաբական երկրներ խզել են հարաբերությունները Կատարի հետ

Բահրեյնը խզում է դիվանագիտական հարաբերությունները Կատարի հետ՝ վերջինիս մեղադրելով ահաբեկիչներին աջակցելու և Բահրեյնի ներքին գործերին խառնվելու մեջ. գրում է «Ռոյթերս»-ը:

Ինչպես նշում է «Ալ Արաբիան», երկու երկրների միջև օդային և ծովային կապն ընդհատված է: Բահրեյնն իր քաղաքացիներից պահանջել է լքել Կատարը 14 օրվա ընթացքում: Կատարի քաղաքացիները նույնպես պետք է դուրս գան Բահրեյնից երկու շաբաթվա ընթացքում, իսկ դիվանագիտական անձինք՝ 48 ժամվա ընթացքում:

«Կատարը Բահրեյնում քաոս է առաջացրել՝ ամենաակնհայտ ձևով խախտելով միջազգային իրավունքի բոլոր համաձայնագրերն ու սկզբունքները՝ ուշադրություն չդարձնելով արժեքների, օրենքների, բարոյականության վրա, ոտնահարելով բարիդրացիական հարաբերությունների սկզբունքները և չկատարելով նախկինում տված խոստումները»,- ասվում է Մանամայի պաշտոնական հայտարարության մեջ:

Բահրեյնի օրինակին են հետևել Սաուդյան Արաբիան, Եգիպտոսը և ԱՄԷ-ն՝ նույնպես խզելով դիվանագիտական հարաբերությունները Կատարի հետ:

Նշենք, որ Կատարի և նրա հարևանների միջև ընդհարումն սկսվեց Ռիադում Պարսից ծոցի երկրների և ԱՄՆ-ի հանդիպումից մեկ շաբաթ անց, երբ կատարական լրատվական գործակալությունը Էմիրի անունից հայտարարություն էր տարածել, ըստ որի՝ վերջինս կողմ է Իրանի հետ հարաբերություններ հաստատելուն: Ավելի ուշ Կատարի ԱԳՆ-ն հայտարարել էր, որ գործակալության էջը կոտրված է եղել հաքերների կողմից, և դա ոչ մի կապ չունի կատարական առաջնորդի հետ:

Սաուդյան Արաբիան, ԱՄԷ-ն և Բահրեյնն այդ արդարացումը համոզիչ չեն համարում և շարունակում են պնդել, որ այդ հայտարարությունն իրոք Կատարի էմիրն է արել: