Ամերիկյան հատուկ ծառայությունները ռուս ցանցահեններին մեղադրում են կատարական լրատվական կայքում կեղծ նյութեր տեղադրելու մեջ

Ամերիկյան հատուկ ծառայությունները կարծում են, որ ռուս հաքերները կոտրել են Կատարի պետական լրատվական գործակալության կայքը և այնտեղ տեղադրել կեղծ լուրեր, որն էլ Կատարի և հարևանների միջև քաղաքական ճգնաժամ է առաջացրել. գրում է CNN-ը։

Հետուստաալիքի տվյալներով՝ ՀԴԲ-ն (Հետաքննությունների դաշնային բյուրո) հետախույզների մի խումբ է ուղարկել Դոհա՝ ենթադրյալ հաքերային հարձակման հետաքննությանը օգնելու համար։

Ինչպես նշում է CNN-ը, ամերիկյան հատուկ ծառայությունների ունեցած տեղեկությունը ցույց է տալիս, որ հարձակման հետևում կանգնած են հենց ռուսական հաքերները։

Ռուս հաքերների ենթադրյալ մասնակցությունն ամերիկյան հետախույզներին և իրավապահ մարմիններին առիթ է տալիս մտածելու, թե Ռուսաստանը փորձում է կրկնել դաշնակիցների դեմ կիբերհարձակումները։

Պաշտոնատար անձանց կարծիքով՝ Ռուսաստանի նպատակն իբրև թե ԱՄՆ-ին և նրա դաշնակիցներին պառակտելն է։

Կատարի արտգործնախարար շեյխ Մոհամեդ բին Աբդուլռահման ալ Թանին հայտարարել է, որ ՀԴԲ-ն հաստատել է կայքը կոտրելու և կեղծ լուրեր տեղադրելու վարկածը։ «Բոլոր մեղադրանքները հիմնված են ապատեղեկատվության վրա, այս ամբողջ ճգնաժամն ապատեղեկատվության վրա է հիմնված»,- ասել է ԱԳ նախարարը։

Հիշեցնենք, որ հունիսի 5-ին Սաուդյան Արաբիան, Եգիպտոսը, Բահրեյնը և ԱՄԷ-ն խզել են դիվանագիտական հաաբերությունները Կատարի հետ՝ նրան մեղադրելով «Իսլամական պետություն» և  «Ալ Քաիդա» ահաբեկչական խմբավորումներին աջակցելու և տարածաշրջանի երկրների ներքաղաքական դրությունը ապակայունացնելու մեջ։ Ավելի ուշ նրանց օրինակին հետևեցին Եմենը, Լիբիան, Մալդիվները, Մավրիկին, ինչպես նաև Հորդանանը և Մավրիտանիան։

CNN-ի փոխանցմամբ՝ ընդհարումը տեղի է ունեցել Պարսից ծոցի երկրների գագաթնաժողովից մեկ շաբաթ անց, երբ կատարական լրատվական գործակալությունն էմիրի անունից հայտարարություն էր արել՝ նշելով Իրանի հետ հարաբերությունների բարելավման մասին։ Թեև Կատարի ԱԳՆ-ն նշել էր, որ հայտարարությունը կեղծ է, Սաուդյան Արաբիան, ԱՄԷ-ն և Բահրեյնն այդ արդարացումը բավարար չէին համարել։