Ճապոնիան նոր հակաահաբեկչական օրենք է ընդունել
Այսօր՝ հունիսի 15-ին, Ճապոնիայի օրենսդիրներն ընդունեցին մի հակասական օրինագիծ, որը երկրի իշխանություններին թույլ է տալիս թիրախավորել ահաբեկչական դավադրությունները. գրում է BBC-ն:
Ճապոնիայի վարչապետ Շինզո Աբեի իշխող դաշինքն առաջադրել է այդ օրինագիծը խորհրդարանի վերին պալատում՝ չնայած ընդդիմության անհամաձայնությանը: Կառավարությունը պնդում է, որ այդ օրենքն անհրաժեշտ է 2020 թ. Ճապոնիայում կայանալիք Օլիմպիական խաղերի ընթացքում անվտանգություն ապահովելու, ինչպես նաև ՄԱԿ-ի համաձայնագրին համապատասխանելու համար:
Քննադատները կարծում են, որ այդ օրինագիծը թուլացնում է քաղաքացիական ազատությունները և կարող է օգտագործվել անմեղ քաղաքացիներին կառավարելու և թիրախավորելու համար:
Ինչպես նշում է BBC-ն, օրենքից դժգոհ հազարավոր քաղաքացիներ բողոքի ցույցեր են կազմակերպել խորհրդարանի շենքի առաջ:
Օրենքը, որը քրեականացնում է 277 գործողությունների պլանավորումը և իրագործումը, փոխում է կազմակերպված հանցագործությունների մասին գործող օրենքը: Ամբողջ խումբը, կազմված երկու կամ ավել անձանցից, կարող է պատասխանատվության ենթարկվել, եթե խմբի անդամներից որևիցե մեկը ներկա է եղել հանցագործության վայրում:
Նոր օրենքն արգելում է նաև հանցավոր խմբերի ընդլայնումը կամ նրանց անօրինական հետաքրքրությունների տարածումը:
BBC-ի փոխացմամբ՝ Ճապոնիան ստորագրել է միջազգային կազմակերպված հանցավորության դեմ ՄԱԿ-ի համաձայնագիրը, սակայն դեռևս չի վավերացրել այն:
Վարչապետ Աբեն կարծում է, որ այդ օրենքը Ճապոնիային թույլ կտա «սերտորեն համագործակցել միջազգային հանրության հետ ահաբեկչության դեմ պայքարում»:
Օրինագծի սկզբնական տարբերակը ներառում էր 676 հանցագործություններ, որոնք կրճատվեցին՝ դառնալով 277: Բացի լուրջ հանցագործություններից, ինչպես օրինակ ահաբեկչական գործողությունների կազմակերպումը, օրենքը ներառում է նաև մի շարք թեթև հանցանքներ, օրինակ՝ երաժշտության կրկնօրինակում, բազմաբնակարան շենքերի դիմաց նստացույցերի կազմակերպում, կեղծ նամականիշների օգտագործում, սպառողական վարկերի չվճարում և այլն:
Քննադատներին չեն գոհացնում կառավարության այն պատճառաբանությունները, թե այդ գործողությունները կարող են հանգեցնել հանցավոր խմբավոումների ֆինանսավորմանը: Նրանց կարծիքով՝ այս օրինագիծը կառավարությանն անսահմանափակ հնարավորություններ է տալիս: