ՌԴ ՊՆ-ն տեղեկացրել է ռուսական օդուժի հարվածի հետևանքով ԻՊ-ի առաջնորդի հնարավոր ոչնչացման մասին
ՌԴ պաշտպանության նախարարությունը ստուգում է մայիսի վերջին Ռաքքայի հարավային արվարձանին ռուսական օդուժի հասցրած հարվածի հետևանքով Իսլամական պետության առաջնորդ Իբրահիմ Աբու Բաքըր ալ-Բաղդադիի ոչնչացման մասին տեղեկատվությունը. գրում է ՏԱՍՍ-ը:
ՌԴ ՊՆ-ում մանրամասնել են, որ մայիսի 28-ի գիշերը հարված է հասցվել հրամանատարական շտաբին, որտեղ անցկացվում էր ԻՊ-ի առաջնորդների խորհրդակցությունը. վերջիններս քննարկում էին այսպես կոչված հարավային միջանցքով Ռաքքայից գրոհայինների դուրսբերման հարցը:
«Տարբեր ալիքներով ստուգվող տեղեկությունների համաձայն՝ այդ հանդիպմանը ներկա է եղել նաև ԻՊ առաջնորդ Աբու Բաքըր ալ-Բաղդադին, որը հարվածի հետևանքով սպանվել է»,- ասվում է նախարարության հայտարարության մեջ:
Ավելի վաղ ԻՊ-ի առաջնորդի մահվան մասին տեղեկացրել էին ԱՄՆ-ի զինված ուժերի ներկայացուցիչները, սակայն մի փոքր ուշ այդ տեղեկությունը հերքվել էր, իսկ ինքը՝ ալ-Բաղդադին հանդես էր եկել իր աջակիցներին ուղղված տեսաուղերձներով:
ՌԴ պաշտպանության նախարարությունում հայտնել են, որ Ռաքքայի հարավային արվարձանին ռուսական Սու-35 և Սու-34 ինքնաթիռների հասցրած հարվածների արդյունքում սպանվել են ԻՊ-ի մի շարք բարձրաստիճան հրամանատարներ, ինչպես նաև միջին կոչում ունեցող 330 դաշտային հրամանատարներ և շարքային գրոհայիններ:
«Սպանվածների թվում են Ռաքքայի էմիր Աբու ալ-Հաջի ալ-Մըսրին, Ռաքքայից մինչև Էս-Սուհնե բնակավայրն ընկած տարածքը ղեկավարող էմիր Իբրահիմ Ան-Նաեֆ ալ-Հաջը և ԻՊ-ի անվտանգության ծառայության պետ Սուլեյման Ալ-Շաուահը»,- նշել են ՊՆ-ում:
ՏԱՍՍ-ի տեղեկություններով՝ Ռուսաստանը ԱՄՆ-ին զգուշացրել է Ռաքքայի հարավային արվարձանին հարված հասցնելու մասին:
«Ռուսական օդուժի գործողությունների ժամկետների և տեղի մասին տեղեկությունն ամերիկյան կողմին նախօրոք փոխանցվել է փոխգործակցության ալիքների միջոցով»,- հաստատել են ՌԴ ՊՆ-ում: