Մերկելը քննադատել է Ռուսաստանի դեմ ամերիկյան նոր պատժամիջոցների նախագիծը
Գերմանիայի կանցլեր Անգելա Մերկելը համակարծիք է արտգործնախարար Սիգմար Գաբրիելի և Ավստրիայի կանցլեր Քրիստիանա Կերնայի հետ Ռուսաստանի դեմ ամերիկյան նոր պատժամիջոցների նախագծի քննադատման հարցում, որը կարող է ազդել նաև եվրոպական ընկերությունների վրա. այս մասին Բեռլինում կայացած ճեպազրույցի ընթացքում հայտարարել է Գերմանիայի նախարարների կաբինետի պաշտոնական ներկայացուցիչ Շտեֆեն Զայբերթը:
«Այդ հայտարարության հետ կապված համաձայնություն կա մեր կառավարությունում: Կանցլերը կիսում է մեր անհանգստությունը՝ կապված Ռուսաստանի դեմ նոր պատժամիջոցների կիրառման հետևանքով եվրոպական ընկերություններին վնասելու հավանականության հետ: Դա անթույլատրելի է»,- ընդգծել է Զայբերթը:
Գերմանիայի արտգործնախարարության ներկայացուցիչ Մարտին Շեֆերը հավելել է, որ ամերիկյան պատժամիջոցների կիրառումը չի համապատասխանում միջազգային իրավունքին:
«Ամերիկացիներն առաջին անգամ չէ, որ այդպիսի քայլի են դիմում. սա անցնում է ամերիկյան պատժամիջոցների օրենսդրության բոլոր սահմանները»,- ասել է Շեֆերը՝ հիշեցնելով ԱՄՆ-ի նախագահ Ռեյգանի վարչակազմի՝ ԽՍՀՄ-ից Եվրոպա գազատարի կառուցմանը խանգարելու փորձը:
«Եթե ԱՄՆ-ի նախագահն օգտվի ԵՄ-ում գազատարների կառուցման և ֆինանսավորման աշխատանքներին մասնակցող գերմանական և եվրոպական ընկերություների դեմ պատժամիջոցներ կիրառելու իրավունքից, մենք դա միջազգային իրավունքի խախտում կհամարենք»,- նշել է Գերմանիայի արտգործնախարարության ներկայացուցիչ: