Պորտուգալիայում բռնկված հրդեհի հետևանքով զոհերի թիվը հասել է 61-ի

Պորտուգալիայում վերջին տարիներին գրանցված ամենախոշոր անտառային հրդեհի հետևաքով ավելի քան 60 մարդ է զոհվել. տեղեկացնում է Publico թերթը:

Աղբյուրի համաձայն՝ հրդեհից տուժել է ևս 60 մարդ, որոնցից շատերի վիճակը ծայրահեղ ծանր է: Իշխանությունները չեն բացառում, որ զոհերի թիվը կարող է ավելանալ:

Հրդեհն սկսվել է հունիսի 17-ին Պորտուգալիայի կետրոնական Լեյրիյա շրջանում: Աղետն ամենաշատ վնասը հասցրել է մայրաքաղաք Լիսաբոնից 200 կմ հեռավորության վրա գտնվող Պեդրոգան-Գրանդի բնակավայրին:

Պորտուգալիայի կառավարությունն ազգային սուգ է հայտարարել, որը կտևի մինչև հունիսի 20-ը. նախագահ Մարսելու Ռեբելու դե Սոուզան չեղյալ է  հայտարարել մինչ այդ նախատեսած բոլոր պաշտոնական հանդիպումները: Հրդեհի մարման աշխատանքներում ներգրավված են հարյուրավոր մարդիկ և օդային սարքավորումներ:

Հրդեհի մարման աշխատանքներին խանգարում են բարձր ջերմաստիճանը և ուժգին քամիները: Պորտուգալացի հրշեջներին օգնություն են ցույց տալիս նաև իսպանական ինքնաթիռները:

Պորտուգալիայի վարչապետ Անտոնիու Կոշտան ժամանել է դեպքի վայր: Նրա խոսքերով՝ այս պահին ամենակաևոր խնդիրներն են հրդեհի մարումը և տուժածների հարազատներին աջակցություն ցույց տալը: Կառավարության ղեկավարը կատարվածն անվանել է վերջին տարիներին երկրին պատուհասած ամենամեծ ողբերգությունը:

Ոստիկանության տվյալներով՝ հրդեհի պատճառը դիտավորյալ հրդեհումն է եղել: Մինչդեռ մասնագետները կարծում են, որ հրդեհը բռնկվել է կայծակի հետևանքով, որին նպաստել է նաև ամբողջ երկրում տիրող բարձր ջերմաստիճանը՝ մոտավորապես 40 աստիճան: