Եվրամիությունը մեկ տարով երկարաձգել է Ղրիմի դեմ պատժամիջոցների կիրառումը

Եվրամիության անդամ երկրների արտգործնախարարներն առանց քննարկման մեկ տարով երկարաձգել են Ղրիմի դեմ պատժամիջոցները. այս մասին տեղեկացնում է ԵՄ-ի խորհուրդը:

Հիշեցնենք, որ թերակղզու նկատմամբ սահմանված ներկայիս պատժամիջոցների ժամկետը պետք է լրանար հունիսի 23-ին:

ԵՄ-ի խորհրդի հայտարարության մեջ ասվում է, որ պատժամիջոցները երկարաձգվել են «մինչև 2018 թ. հունիսի 23-ը՝ ի պատասխան Ղրիմի և Սևաստոպոլի ապօրինի միացմանը Ռուսաստանին»:

Ղրիմի դեմ առաջին անգամ պատժամիջոցներ են սահմանվել 2014 թ.: Սահմանափակումներն սկսվեցին առանց ուկրաինական վկայականների ապրանքների ներկրումը դեպի ԵՄ արգելքով, ապա Եվրամիությունը սահմանափակեց իր անդամ երկրներից զգալի թվով ապրանքների մատակարարումը Ղրիմ և ամբողջությամբ արգելեց ներդրումներ կատարել թերակղզու տնտեսության մեջ:

ԱՄՆ-ն և ԵՄ-ն նաև անհատական պատժամիջոցներ են սահմանել Ղրիմի մի շարք պատգամավորների դեմ: Վաշինգտոնում բազմիցս հայտարարել են, որ պատժամիջոցներն ուժի մեջ կլինեն այնքան ժամանակ, քանի դեռ Ռուսաստանը պահպանում է թերակղզու վերահսկողությունը:

Հիշեցնենք, որ Ղրիմը վերամիավորվել է Ռուսաստանին Ուկրաինայի պետական հեղաշրջումից հետո կազմակերպված հանրաքվեի արդյունքում: Ռուսաստանին միանալու օգտին էր քվեարկել թերակղզու բնակիչների 95%-ը: ՌԴ նախագահ Վլադիմիր Պուտինի խոսքերով՝ Ղրիմի հարցը «վերջնականապես փակ է»: