Ֆրանսիայի ՆԳՆ-ն հաստատել է Փարիզում ոստիկանների վրա հարձակում գործած անձի մահվան մասին լուրը
![](https://www.noror.am/sites/default/files/styles/header_image/public/header-images/pariz.jpg?itok=dpd1WSDA)
Փարիզում ոստիկանական ավտոբուսի վրա հարձակում գործած անձն սպանվել է. այս մասին լրագրողներին հայտնել է Ֆրանսիայի ներքին գործերի նախարար Ժերար Կոլոնը:
«Սա արդեն երկրորդ հարձակումն է իրավապահ մարմինների վրա. այն ցույց է տալիս, թե որքան բարձր է ահաբեկչության սպառնալիքը երկրում»,- հայտնել է նախարարը:
Կոլոնը հանցագործի գործողությունները որակել է որպես ահաբեկչություն իրականացնելու փորձ: Նա հայտնել է, որ դեպքի առիթով հետաքննություն է անցկացվում, իսկ դեպքի վայրում հետաքննչական խումբ է աշխատում:
Այդուհանդերձ, նախարարն ընդգծել է, որ երկրում շարունակում է գործել արտակարգ դրության ռեժիմը, որը Ֆրանսիայում սահմանվել էր 2015 թ. ահաբեկչական գործողություններից հետո: «Հունիսի 21-ին կայանալիք Նախարարների խորհրդի նիստի ժամանակ ես կնեկայացնեմ արտակարգ դրության ռեժիմը երկարաձգելու հետ կապված օրենքի նախագիծը»,- հայտնել է Կոլոնը:
Ինչպես տեղեկացնում է ՏԱՍՍ-ը, հանցագործը, որը պոտենցիալ վտանգավոր իսլամիստների ցուցակում էր, մեքենայով մխրճվել էր Ելիսեյան դաշտում կանգնած ոստիկանական ավտոբուսի մեջ: Միջադեպը տեղի է ունեցել Ելիսեյան պալատից 250 մ հեռավորության վրա։ Հատկանշական է, որ Ելիսեյան դաշտի այդ հատվածը առավել պաշտպանված տարածքներից է:
Ոստիկանության տվյալներով՝ իրավապահ մարմիններից և անցորդներից ոչ ոք չի տուժել: Հայտնի է, որ հանցագործի մեքենայում «կալաշնիկով» տեսակի հրացան և գազի բալոն է հայտնաբերվել:
Վերջին երկու ամիսների ընթացքում սա երկրորդ հարձակումն է Ելիսեյան դաշտում հսկողություն իրականացնող ոստիկանների վրա: Ապրիլի վերջին 39-ամյա ֆրանսիացի Շերֆին ինքնաձիգից կրակ էր բացել իրավապահների ուղղությամբ, ինչի հետևանքով նրանցից մեկը զոհվել էր, իսկ երկուս՝ վիրավորվել: