Արաբական երկրները Կատարին ներկայացրել են իրենց պահանջների ցանկը․ AP
![](https://www.noror.am/sites/default/files/styles/header_image/public/header-images/doha_1.jpg?itok=9xTgGK5j)
Արաբական չորս երկրներ Կատարից պահանջում են խզել դիվանագիտական հարաբերություններն Իրանի հետ, փակել թուրքական ռազմաբազան և վերացնել «Ալ Ջազիրա» արբանյակային հեռուստաալիքը։ Այս մասին հայտնում է Associated Press գործակալությունը։
Ավելի վաղ հաղորդվում էր, որ Սաուդյան Արաբիան, Եգիպտոսը, ԱՄԷ-ն և Բահրեյնը Քուվեյթի միջնորդությամբ Կատարի իշխանություններին են փոխանցել իրենց պահանջների ցանկը։
Ցանկի հեղինակները պահանջում են, որ Կատարը դադարեցնի այնտեղ գտնվող իրենց քաղաքացիների հպատակագրումը և արտահանձնի վերջիններիս։ Դոհայից պահանջվում է նաև այդ չորս երկրների իշխանություններին հանձնել վերջիններիս կողմից հետախուզվող անձանց, որոնք մեղադրվում են ահաբեկչություն կատարելու մեջ։
Պահանջները կատարելու համար Կատարին տրվում է 10 օր։
Հիշեցնենք, որ հունիսի 5-ին Սաուդյան Արաբիան, Եգիպտոսը, Բահրեյնը և ԱՄԷ-ն խզել են դիվանագիտական հաաբերությունները Կատարի հետ՝ նրան մեղադրելով «Իսլամական պետություն» և «Ալ Քաիդա» ահաբեկչական խմբավորումներին աջակցելու և տարածաշրջանի երկրների ներքաղաքական դրությունը ապակայունացնելու մեջ։ Ավելի ուշ նրանց օրինակին հետևեցին Եմենը, Լիբիան, Մալդիվները, Մավրիկին, ինչպես նաև Հորդանանը և Մավրիտանիան։
Սկանդալը հասունացել էր Պարսից ծոցի երկրների գագաթնաժողովից մեկ շաբաթ անց, երբ կատարական լրատվական գործակալությունն էմիրի անունից հայտարարություն էր արել՝ նշելով Իրանի հետ հարաբերությունների բարելավման մասին։ Թեև Կատարի ԱԳՆ-ն նշել էր, որ հայտարարությունը կեղծ է, Սաուդյան Արաբիան, ԱՄԷ-ն և Բահրեյնն այդ արդարացումը բավարար չէին համարել։