Վիրջինիայի բնակիչը մեղադրվում է լրտեսության մեջ
ԱՄՆ-ի Վիրջինիա նահանգի Լիսբուրգ քաղաքի 60-ամյա բնակիչ Քեվին Պատրիկ Մելորին այսօր ներկայացել է դաշնային դատարանին՝ չինացի գործակալին հույժ գաղտնի փաստաթղթեր փոխանցելու մեղադրանքով: Մեղադրող կողմի ցուցմունքների համաձայն՝ 2017 թ. մարտին և ապրիլին Մելորին մեկնել է Շանհայ և այնտեղ հանդիպել Չինաստանի մի քաղաքացու հետ, որը, նրա հավաստմամբ, աշխատել է Չինաստանի ժողովրդավարական հանրապետության հետախուզական ծառայությունում. այս մասին տեղեկացնում է Justice News-ը:
Հայցը ներկայացվել է Ազգային անվտանգության հարցերով գլխավոր դատախազի օգնական, Վիրջինիայի արևելյան շրջանի դատախազ Դանա Ջ. Բենտեի և ՀԴԲ-ի վաշինգտոնյան գրասենյակի տնօրենի օգնական Էնդրյու Վ. Վեյլի կողմից:
«Քեվին Մելորիին նախկինում վստահված են եղել հույժ գաղտնի տեղեկություններ, որոնք նա ենթադրաբար հաղորդել է օտար երկրի կառավարության ներկայացուցիչներին և մտադիր է եղել շարունակել լրտեսությունը: Բացի այդ, հարցաքննությունների ընթացքում նա քննիչներին սխալ տեղեկություններ է տրամադրել իր գործունեության վերաբերյալ: ՀԴԲ-ն կշարունակի այն անձանց գործերի հետաքննությունը, որոնք վտանգի տակ են դնում ազգային անվտանգությունը՝ տեղեկատվության ապօրինի հրապարակմամբ»,- հայտարարել է Վեյլը:
Մայիսի 24-ին ՀԴԲ-ի գործակալների անցկացրած հարցաքննության ժամանակ Մելորին հայտնել է, որ Չինաստանի քաղաքացին ներկայացել է որպես Շանհայի հասարակական գիտությունների ակադեմիայի (ՇՀԳԱ) աշխատակից: ՀԴԲ-ի փոխանցմամբ՝ 2014 թ.-ից ի վեր Չինաստանի հետախուզական ծառայության գործակալները ներկայանում են ՇՀԳԱ-ի աշխատակիցների անվան տակ:
Justice News-ի փոխանցմամբ՝ Մելորին մարտին և ապրիլին Շանհայ է մեկնել Չինաստանի քաղաքացուն և նրա ղեկավարին հանդիպելու նպատակով: Երբ Մելորին համաձայնել էր ցույց տալ այն սարքը, որով կապ է հաստատել Չինաստանի քաղաքացու հետ, ՀԴԲ-ի գործակալները պարզել էին, որ Մելորին ութ տարբեր փաստաթղթեր է կոդավորված ձևով ուղարկել նրան. դրանցից երեքը հույժ գաղտնի տեղեկատվություն են պարունակել ԱՄՆ-ի կառավարական գործակալության վերաբերյալ:
Մելորին ԱՄՆ-ի քաղաքացի է, որն աշխատում է GlobalEx ՍՊԸ-ում և շատ լավ տիրապետում է չինարենին: Նա աշխատել է մի շարք կառավարական գործակալություններում, որի շնորհիվ էլ նրան հասանելի են եղել մի շարք հույժ գաղտնի տեղեկություններ մինչև 2012 թ. հոկտեմբեր, երբ նա ազատվել է աշխատանքից: Մեղավոր ճանաչվելու դեպքում Մելորիին ցմահ բանտարկություն է սպասվում: