ՌԴ Պետդումայում առաջարկում են ավելացնել կաշառակերության համար նախատեսված պատժի չափը

Ռուսաստանի Դաշնության օրենսդիրներն առաջարկում են խստացել կաշառք տվողի և վերցնողի համար նախատեսված պատիժը՝ հասցնելով այն մինչև չորս տարվա ազատազրկման, ինչպես նաև քրեական օրենսգիրք մտցնել «ոչ նյութական կաշառքի» գաղափարը։ Այս մասին գրում է «Իզվեստիա» թերթը։

Քրեական օրենսգրքում փոփոխություններն առաջարկել է Պետդումայի՝ անվտանգության և հակակոռուպցիոն հանձնաժողովը։ Նախագծի համահեղինակ, հանձնաժողովի փոխնախագահ Անատոլի Վիբորնին թերթին տված հարցազրույցում նշել է, որ միջնորդ դատավորները նույնպես կներառվեն քրեական օրենսգրքի գործողության դաշտում։ Լիազորութունները չարաշահելու դեպքում նրանց սպառնում է մինչև 3 տարվա ազատազրկում։

«Առաջարկվում է խստացնել կաշաք տալու և վերցնելու համար նախատեսված պատիժը։ Այժմ այդ հանցագործության համար նախատեսված առավելագույն պատիժը, համապատասխանաբար, երկու և երեք տարվա ազատազրկումն է։ Օրինագծի համաձայն՝ ազատազրկման ժամկետն ավելանում է՝ հասնելով մինչև չորս տարվա։ Այսպիսով՝ այդ հանցագործությունն այլևս համարվելու է միջին ծանրության, իսկ դրա վաղեմության ժամկետը երկուսից դառնում է վեց տարի», - գրում է թերթը։

Ներկայիս քրեական օրենսգրքով՝ կաշառք է համարվում միայն գումարը, գույքը և ծառայությունը, որի արժեքը հնարավոր է հաշվել։ Փոփոխություններով նախատեսված է քրեական օրենսգրքում ավելացնել այնպիսի հասկացություններ, ինչպիսիք են՝ «բարոյական օգուտներ», «ոչ նյութական բնույթի ծառայություններ» և այլն։

«Դրանք կարող են լինել փոխշահավետ ծառայություններ։ Օրինակ՝ երբ բարձրաստիճան պետական պաշտոնյայի՝ անհրաժեշտ որակներ չունեցող բարեկամին վերցնում են ինչ-որ առևտրային կազմակերպությունում աշխատանքի, իսկ պաշտոնյան օգնում է բիզնեսին՝ օգտագործելով իր պաշտոնեական հնարավորությունները», - ասել է Վիբորնին։

Ծրագիրը նախատեսված է Պետդումա մտցնել մինչև գարնանային նստաշրջանի ավարտը։