Բեռլինի կարծիքով՝ անհնար է միջազգային կարևոր խնդիրները լուծել առանց Ռուսաստանի

Աշխարհն ունի Ռուսաստանի կարիքը Սիրիայում, Լիբիայում, Աֆղանստանում և Ուկրանիայի արևելքում եղած հակամարտությունների կարգավորման հարցում. այսպիսի հայտարարությամբ է հանդես եկել Գերմանիայի արտգործնախարար Սիգմար Գաբրիելը:

«Ներկայիս միջազգային խոշոր հակամարտությունները հնարավոր է լուծել միայն համագործակցության և փոխվստահության միջոցով: Կառուցողական Ռուսաստանը մեզ պետք է Սիրիայում, Լիբիայում, Աֆղանստանում և Ուկրաինայի արևելքում: Այս մասին ես կխոսեմ նաև Ռուսաստանի իմ գործընկերների հետ»,- հայտարարել է նախարարը Կրասնոդար մեկնելուց առաջ, որտեղ անցկացվելու է Ռուսաստանի և Գերմանիայի գործընկեր-քաղաքների մասնակցությամբ համաժողովը:

Պաշտոնյան ընդգծել է, որ անգամ քաղաքական դժվարին ժամանակներում անհրաժեշտ է շարունակել երկխոսությունը, քանի որ դա վստահությունը պահպանելու և խնդիրներին խաղաղ հանգուցալուծում տալու միակ ճանապարհն է:

«Անկախ քաղաքական տարաձայնություններից՝ մենք չպետք է մոռանանք, որքան սերտ և բազմաբովանդակ էին դարձել Գերմանիայի և Ռուսաստանի հարաբերություները «սառը պատերազմի» ավարտին»,- հավելել է Գաբրիելը:

Գերմանիայի արգործնախարարը նշել է նաև, որ երկկողմ հարաբերություների զարգացման գործում զգալի ներդրում ունեն քաղաքների և տարածաշրջանների միջև համագործակցությունները։

Ինչպես փոխանցում է «Ռիա Նովոստի»-ն, 14-րդ ռուս-գերմանական գործընկեր-քաղաքների համաժողովն անցկացվելու է Կրասնոդարում հունիսի 28-30-ը: