Բրազիլիայի նախագահը չեղարկել է իր մասնակցությունը G20-ի գագաթնաժողովին
Բրազիլիայի նախագահ Միշել Թեմերը չեղարկել է իր մասնակցությունը Գերմանիայում կայանալիք G20-ի գագաթնաժողովին։ Այս մասին հայտնել է նախագահի մամուլի ծառայությունը։
Մեծ քսանյակի երկրների ղեկավարների գագաթնաժողովն անցկացվելու է հուլիսի 7-8-ին Գերմանիայի Համբուրգ քաղաքում։ Թեմերի մասնակցության չեղարկման պատճառների մասին պաշտոնապես դեռ ոչինչ չի հաղորդվել։
Ոչ պաշտոնական աղբյուրները, սակայն, հայտնում են, որ որոշումը կայացվել է կոռուպցիոն խոշոր սկանդալի ֆոնին։ Երկրի ղեկավարին կոռուպցիայի մեջ է մեղադրում Կոնգրեսի ստորին պալատը։ Ավելի վաղ երկրի գլխավոր դատախազը Թեմերին մեղադրանք էր առաջադրել «պասիվ կոռուպցիայի» հոդվածով։ Մեղադրանքն ուղարկվել է Գերագույն դատարան, և այժմ խորհրդարանի պալատը պետք է քվեարկի, որպեսզի դատարանին թույլ տա գործ սկսել երկրի ղեկավարի դեմ։
Պատգամավորների երկու երրորդի ձայնը բավարար է դատական գործին ընթացք տալու համար։