Լավրովն ԱՄՆ-ին արժանի հարված է խոստացել Դամասկոսի դեմ գործողություններ ձեռնարկելու դեպքում
Ռուսաստանը համապատասխան արձագանք կտա ԱՄՆ-ին, եթե վերջինս իրականացնի Դամասկոսի հասցեին հնչեցրած սպառնալիքները՝ կապված ենթադրյալ քիմիական հարձակման պատրաստման հետ. այս մասին հայտարարել է ՌԴ արտգործնախարար Սերգեյ Լավրովը գերմանացի գործընկերոջ՝ Սիգմար Գաբրիելի հետ համատեղ մամլո ասուլիսի ընթացքում:
«Ես հուսով եմ, որ այս անգամ ԱՄՆ-ն կառաջնորդվի իսկապես քիմիական զենքի տարածումը կանխելու ռեժիմի պահպանման անհրաժեշտությամբ և չի շահարկի մտացածին հետախուզական տվյալներ, որոնք իբրև թե գաղտնի են և չեն կարող հրապարակվել, սակայն իրականում պարզապես պատճառ են ահաբեկիչների դեմ պայքարող Սիրիայի կառավարական զորքերին հարված հասցնելու համար»,- Լավրովի խոսքերը փոխանցում է «Ինտերֆաքս»-ը:
Նախարարը հաստատել է, որ վերջերս ԱՄՆ-ի պետքարտուղար Ռեքս Թիրլերսոնի հետ ունեցած հեռախոսազրույցի ընթացում վերջինս նրան հայտնել է, որ իրենք տեղեկություններ ունեն Դամասկոսի կողմից քիմիական հարձակում նախապատրաստելու մասին: Ավելի վաղ Վաշինգտոնն Ասադին սպառնացել էր , որ այդպիսի հարձակման դեպքում «նա թանկ կվճարի»:
Հիշեցնենք, որ ապրիլին Հան-Շեյհուն քաղաքի վրա կատարված քիմիական հարձակման հետևանքով 87 մարդ էր զոհվել, մոտ 200-ը՝ վիրավորվել: Սիրիական ընդդիմությունը և Արևմուտքի երկրները հարձակման մեջ մեղադրեցին կառավարական զորքերի օդուժին: Իր հերթին Դամասկոսը հայտարարեց, որ ռազմի դաշտում քիմիական զենք չի կիրառել և չի կիրառի:
Ռուսաստանի նախագահ Վլադիմիր Պուտինը սիրիական բանակի կողմից քիմիական զենքի կիրառման մասին հայտարարությունը սադրանք է անվանել: Նրա կարծիքով՝ դա արվել է Ասադին վարկաբեկելու համար: