Գերմանիայի իշխանություններն արգելել են Էրդողանին ելույթ ունենալ թուրքական համայնքի առջև

Գերմանիայի կառավարությունն արգելել է Թուրքիայի նախագահ Ռեջեփ Թայիփ Էրդողանին ելույթ ունենալ իր հայրենակիցների առջև հաջորդ շաբաթ կայանալիք G20-ի գագաթնաժողովի շրջանակներում Համբուրգ կատարելիք այցի ժամանակ։ Այս մասին Մոսկվայում հայտարարել է Գերմանիայի արտգործնախարար Սիգմար Գաբրիելը․ գրում է DPA լրատվական գործակալությունը։

«Մենք Թուրքիայի իշխանություններին հայտնել ենք, որ նման ելույթը Գերմանիայում անհնար է։ Մեր սահմանադրությունը թույլ է տալիս այդպիսի որոշում ընդունել», - ասել է Գաբրիելը։

Գերմանական կառավարության ներկայացուցիչ Շտեֆան Զայբերտը Spiegel լրատվականին տված հարցազրույցում հայտնել է, որ որոշումը համաձայնեցվել է կանցլեր Անգելա Մերկելի հետ։ «ԱԳ նախարարի հայտարարությունը համաձայնեցված է կանցլերի հետ։ Դա արտահայտում է մեր կառավարության դիրքորոշումը», - ասել է կառավարության ներկայացուցիչը։

Ավելի վաղ Սիգմար Գաբրիելը հայտնել էր, որ հունիսի 28-ին Գերմանիայի ԱԳՆ-ն պաշտոնական հարցում էր ստացել Թուրքիայից, որոց խնդրվում էր երկրի իշխանություններից թույլ տալ Էրդողանին G20-ի գագաթնաժողովին մասնակցելու համար կատարելիք այցի շրջանակում ելույթ ունենալ թուրքական համայնքի առջև։ Գերմանիայի արտաքին քաղաքական գերատեսչության ղեկավարի խոսքով՝ խնդրանքը մերժվել էր՝ հաշվի առնելով Անկարայի և Բեռլինի միջև առկա տարաձայնությունները։