ԱՄՆ-ի Սենատը վերաձևակերպել է հակառուսական պատժամիջոցների օրինագիծը
ԱՄՆ-ի Կոնգրեսի սենատը, հաշվի առնելով սահմանադրական պահանջները, վերաձևակերպել է Ռուսաստանի դեմ պատժամիջոցների վերաբերյալ օրինագիծը և կրկին ուղարկել այն Ներկայացուցիչների պալատ։ ՏԱՍՍ-ը, հղում կատարելով Կոնգրեսի աղբյուրներին, տեղեկացնում է, որ նոր փաստաթուղթն ընդունվել է սենատորների «համընդհանուր համաձայնությամբ»։ Այսպիսով այն համարվում է ընդունված բոլոր 100 ձայներով, մինչդեռ անցյալ անգամ երկու օրենսդիրներ դեմ էին քվեարկել։
Մասնագետներից մեկի հավաստմամբ՝ Ներկայացուցիչների պալատն այդ օրինագծով զբաղվելու է հուլիսի 4-ից հետո, երբ ԱՄՆ-ում նշվում է գլխավոր ազգային տոնը՝ Անկախության օրը։
Ինչպես նշում է ՏԱՍՍ-ը, ԱՄՆ Կոնգրեսի Սենատն աշխատանքները վերսկսելու է տոնական արձակուրդից հետո՝ հուլիսի 10-ին, իսկ Ներկայացուցիչների պալատը՝ հուլիսի 11-ին։ Մինչ այդ՝ հուլիսի 7-8-ը, Համբուրգում կկայանա G20-ի գագաթնաժողովը, որի ժամանակ ԱՄՆ-ի և Ռուսաստանի առաջնորդներն, ամենայն հավաականությամբ, կհանդիպեն առաջին անգամ։
Ռուսաստանի դեմ նոր պատժամիջոցների նախնական տարբերակը հավանության էր արժանացել Սենատում երկու շաբաթ առաջ։ Ըստ փաստաթղթի՝ սահմանափակող միջոցառումներ պետք է կիրառվեն որոշակի անձանց դեմ․ դրա կետերից մեկի համաձայն՝ նախագահն իրավունք չունի ինքնուրույն որոշումներ կայացնել՝ պատժամիջոցների մեղմացման հետ կապված։
Ավելի ուշ հայտնի դարձավ, որ Սենատի որոշումն ընդունվել է սահմանադրական նորմերի որոշակի շեղումներով, որոնք պահանջում էին հեռացնել ԱՄՆ-ի բյուջեի եկամտի վրա ազդող կետերը։ Այժմ օրիագծի բոլոր տեխնիկական սխալներն ուղղված են։
ՏԱՍՍ-ի փոխանցմամբ՝ Ներկայացուցիչների պալատի հանրապետական մեծամասնությունը պաշտոնապես կողմ է հակառուսական պատժամիջոցների խստացմանը, միայն թե որոշ փոփոխություններով։ Մինչդեռ Դեմոկրատական կուսակցությունը նրանց մեղադրում է այս նախաձեռնությունը Սպիտակ տան օգտին աշխատեցնելու մեջ։
Սպիտակ տունն իր հերթին չի մեկնաբանում նոր պատժամիջոցների հաստատումը, բայց սկզբունքորեն կողմ է պատժամիջոցների քաղաքականությունում «ճկունության» և արտաքին աշխարհի հետ բանակցություններ անցկացնելու իրավունքի պահպանմանը։