Մանրամասներ՝ Ռուսաստանի և Չինաստանի առաջնորդների հանդիպումից
Ռուսաստանի նախագահ Վլադիմիր Պուտինը և նրա չինացի գործընկեր Սի Ցզինպինը երեկ՝ հուլիսի 3-ի երեկոյան ունեցած հանդիպման ընթացքում քննարկել են Կորեական թերակղզու և Սիրիայի հետ կապված հարցերը. այս մասին տեղեկացնում է «Սինհույա» գործակալությունը:
«Երկու երկրների առաջնորդները պայմանավորվել են երկխոսությունների և բանակցությունների միջոցով միասին հասնել թերակզու խնդիրների կարգավորմանը»,- ասվում է հայտարարության մեջ:
Չինաստանի նախագահը հայտարարել է, որ կողմերը պետք է ամրապնդեն համագործակցությունը և անպայման աջակցեն միմյանց զարգացման ուղիներ փնտրելու հարցերում, պաշտպանեն ինքնիշխանությունը և ազգային անվտանգությունը:
Ինչպես նշում է Լենտա-ն, ՌԴ նախագահը հուլիսի 3-ին Կրեմլում ընդունել է երկօրյա այցով Մոսկվայում գտնվող Սիին: Նրանց հանդիպման հիմնական մասն անցել է փակ դռների հետևում՝ առանց լրագրողների: Ռուսաստանի նախագահի մամլո խոսնակ Դմիտրի Պեսկովի փոխանցմամբ՝ երկու երկրների առաջնորդները ոչ պաշտոնական ընթրիք են ունեցել:
Սի Ցզինպինի այցի արդյունքում կհաստատվի 2017-2020 թ․թ. հարևանության, ընկերության և համագործակցության պայմանագրի իրականցման գործողությունների ծրագիրը:
Հանդիպման ընթացքում Վլադիմիր Պուտինը հայտնել է նաև, որ գոհ է Չինաստանի հետ ապրանքաշրջանառության զգալի աճից, և պատրաստվում է իր գործընկերոջ հետ քննարկել ոչ միայն տնտեսական, այլև անվտանգությանը վերաբերող հարցեր:
ՏԱՍՍ-ը տեղեկացրել է, որ ՌԴ նախագահը Սիին է հանձնել Սբ. Անդրեաս առաքյալի հուշամեդալը՝ ասելով, որ այն «վկայությունն է Ռուսաստանի մատուցած հատուկ ծառայությունների՝ ուղղված երկու երկրների ժողովուրդների բարեկամության, համագործակցության և ռազմավարական փոխգործունեության զարգացմանը»: