Արաբական երկրներն ստացել են Կատարին ներկայացրած վերջնագրի պատասխանը

Սաուդյան Արաբիան, Բահրեյնը, Եգիպտոսը և ԱՄԷ-ն համատեղ հայտարարությամբ են հանդես եկել՝ նշելով, որ ստացել են Կատարի պատասխանն իրենց կողմից ներկայացված պահանջներին։ Այս մասին հայտնում է «Ալ Արաբիյա» հեռուստաալիքը։

«Կատարն արաբական չորս երկրներին ուղարկել է վերջիններիս կողմից՝ Քուվեյթի միջնորդությամբ ներկայացված պահանջների պատասխանը», - ասվում է համատեղ հայտարարության մեջ։

Նշվում է նաև, որ համատեղ պատասխանը կհրապարակվի միաժամանակ։

Հիշեցնենք, որ Կատարին ներկայացված պահանջները կատարելու ժամկետի լրացուցիչ երկու օրը արդեն լրացել է։

Հունիսի 22-ին Քուվեյթը՝ որպես միջնորդ, Կատարին էր ներկայացրել հարաբերությունները վերսկսելու համար 13 պահանջներից բաղկացած ցուցակ: Ի թիվս այլ պայմանների՝ Դոհայից պահանջում են փակել «Ալ Ջազիրա» հեռուստաալիքը և խզել Իրանի հետ դիվանագիտական հարաբերությունները: Կատարը պարտավոր է նաև փակել թուրքական ռազմաբազան և դադարեցնել Անկարայի հետ ռազմական համագործակցությունը: Բացի այդ երկրից փոխհատուցում են պահանջել, որի չափը դեռևս չի նշվել: Այս պայմանների իրագործման համար Կատարին 10 օր ժամկետ էր տրվել, որը լրացել էր հուլիսի 2-ին. Քուվեյթի առաջարկով՝ այն երկարացվել էր ևս երկու օրով:

Հիշեցնենք, որ հունիսի 5-ին Սաուդյան Արաբիան, Եգիպտոսը, Բահրեյնը, ԱՄԷ-ն և ավելի ուշ նրանց միացած Եմենը, Լիբիան, Մալդիվները, Մավրիկին, Մավրիտանիան, Կոմորյան կղզիները հայտարարել էին Կատարի հետ դիվանագիտական հարաբերությունները խզելու մասին՝ նրան մեղադրելով արաբական երկրների ներքաղաքական իրավիճակներն ապակայունացնելու և ահաբեկչությանն աջակցելու մեջ: