Ռուսական ռմբակոծիչները հարված են հասցրել Սիրիայում ԻՊ-ի հենակետերին
Ռուսական ռազմաօդային ուժերի հեռավոր ավիացիայի ռազմավարական Տու-95ՄՍ ռմբակոծիչները X-101 թևավոր հրթիռներով հարվածներ են հասցրել Իսլամական պետության գրոհայինների հենակետերին. տեղեկացնում է ՏԱՍՍ-ը:
«Հուլիսի 5-ին Ռուսաստանի տարածքի Էնգելս օդանավակայանից դուրս եկած ռազմավարական Տու-95ՄՍ ռմբակոծիչները նորագույն X-101 թևավոր հրթիռներով հարվածներ են հասցրել Համա և Հոմս շրջանների սահմանին Իսլամական պետության ահաբեկիչների ռազմաբազաներին»,- այս մասին ասվում է ՌԴ պաշտպանության նախարարության հայտարարության մեջ:
ՊՆ-ում մանրամասնել են, որ «հարվածի արդյունքում ոչնչացվել է զենքի և զինամթերքի երեք խոշոր պահեստ, ինչպես նաև Աքերբաթ քաղաքում գտնվող ահաբեկիչների հրամանատարական կետը, որը հաստատված է եղել օբյեկտիվ վերահսկողության տվայլներով»:
Նորագույն գերճշգրիտ X-101 հրթիռներով հարվածներն իրակավացել են մոտ 1000 կմ հեռավորությունից: Ռազմավարական ռմբակոծիչներին օգնություն են ցույց տվել Հմեյմիմ ավիաբազայի Սու-30ՍՄ կործանիչները: Մարտական առաջադրանքի բարեհաջող իրականացումից հետո ռուսական բոլոր ինքնաթիռները վերադարձել են հենակետային օդանավակայաններ:
Ինչպես նշում է ՏԱՍՍ-ը, X-101-ը ռուսական ռազմավարական օդային մեկնարկման թևավոր հրթիռ է, որը պատրաստված է ռադարային տեսանելիության նվազեցման նորագույն տեխնոլոգիաների կիրառմամբ: Այն ընդունակ է խոցել մինչև 4500 կմ հեռավորության վրա գտնվող թիրախները: X-101 հրթիռները կարող են կրել նաև միջուկային մարտագլխիկներ: