Եվրամիությունը պատժամիջոցներ է սահմանել Լիբիայի նկատմամբ

ԵՄ-ն մի շարք արտասովոր սահմանափակումներ է սահմանել Լիբիայի նկատմամբ՝ արգելելով այդ երկիր ներմուծել փչովի նավակներ և նավերի շարժական շարժիչներ. ասվում է ԵՄ-ի Խորհրդի՝ Լիբիայի վերաբերյալ վերջնական հայտարարության մեջ: Այսպիսով նրանք փորձում են սահմանափակել Միջերկրական ծովով Եվրոպա հասնել ցանկացող ներգաղթյալների քանակը:

Արտգործնախարարները նաև որոշել են մեկ տարով՝ մինչև 2018 թ. վերջ, երկարացնել Տրիպոլիում լիբիական սահմանապահների վերապատրաստման Եվրամիության առաքելությունը:

ՏԱՍՍ-ի փոխանցմամբ՝ նախարարները խոստացել են մոտ ժամանակներս որոշում կայացնել միգրացիոն հոսքերի վերահսկման ԵՄ-ի ռազմածովային գործողության՝ «Սոֆիա»-ի երկարացման վերաբերյալ: Այդ գործողությունը մեկնարկել է 2015 թ.՝ աղետի ենթարկված ներգաղթյալների նավերի փրկության և նրանց փոխադրողների դեմ պայքարի համար:

Գործնականում Եվրամիության ռազմանավերը փրկում են Լիբիայի ափամերձ տարածքներում գտնվող ներգաղթյալներով լցված նավերն ու նավակները, որից հետո նրանց տեղափոխում եմ ԵՄ տարածք: Եվրոպական սահմանապահների գործողությունների անմիջական արդյունքը դարձավ ներգաղթյալներին տեղափոխող նավերի որակի իջեցումը. եթե 2015-ին դրանք հին, բայց ծովին հարմարեցված ձկնորսական նավակներ էին, ապա այսօր՝ լաստանավեր և փչովի նավակներ:

Նշենք, որ այս տարվա սկզբից ներգաղթյաների հոսքը դեպի Եվրոպա կրկին սկսեց աճել: Նրանց հիմնական երթուղին անցնում է Լիբիայի տարածքով և Միջերկրական ծովով դեպի Իտալիա: Միջազգային միգրացիոն կազմակերպության տվյալների համաձայն՝ տարվա սկզբից այս երթուղով Եվրոպա է անցել ավելի քան 95 հազար մարդ, ճանապարհին մահացել կամ անհետ կորել է ավելի քան 2100-ը:

Ինչպես նշում է ՏԱՍՍ-ը, Լիբիան ամբողջ Աֆրիկայի միգրանտների համար տարանցիկ գոտի է դարձել 2011 թ. Բենգազիում տեղի ունեցած ապստամբությունից հետո, որի արդյունքում երկրում ոչնչացան բոլոր պետական կառույցները: