Մադուրոյի կոշտ պատասխանը՝ Եվրամիությանը
Վենեսուելայի նախագահ Նիկոլաս Մադուրոն կարծում է, որ ընդդիմության կողմից կազմակերպված հանրաքվեն իրավական ուժ չունի: Ընդդիմությունը և նրա կողմնակիցները դեմ են քվեարկել սահմանադրական հանձնաժողովի ստեղծմանը: Մադուրոն պատրաստվում է ընտրություններ անցկացնել հուլիսի 30-ին: Նրա դիրքորոշումը քննադատել է ԵՄ-ի ներկայացուցիչ Ֆեդերիկա Մոգերինին. գրում է Euronews-ը:
«Ֆեդերիկա Մոգերինին՝ արտաքին հարցերով եվրահանձնակատարը, որոշել է մեզ սովորեցնել ինչպես ղեկավարել երկիրը: Վենեսուելան ազատ և ինքնիշխան պետություն է, մենք ոչ ոքի թույլ չենք տա խառնվել մեր ներքին գործերին: Ֆեդերիկա Մոգերի՛նի, սա քո գործը չէ: Վենեսուելան քեզ համար Եվրամիության գաղութը չէ»,- այսպիսի պատասխան է տվել Մադուրոն:
Տեսնելով իշխանությունների արձագանքը՝ ընդդիմությունը որոշել է 24-ժամյա գործադուլ անցկացնել, որը կկազմակերպվի հուլիսի 20-ին: Այս մասին տեղեկացրել է Ազգային ժողովի փոխնախագահ, «Ժողովրդավարական միասնության դաշինք»-ի անդամ Ֆրեդի Գևարան:
«Մենք պատրաստվում ենք զանգվածային խաղաղ ցույցեր իրականացնել, որոնք կուղեկցվեն մեկօրյա գործադուլով, որպեսզի ճնշում գործադրենք կառավարության վրա»,- հայտարարել է նա:
Նշենք, որ ավելի վաղ Մոգերինին կոչ էր արել Վենեսուելայի իշխանություններին դադարեցնել սահմանադրական հանձնաժողովի ստեղծման աշխատանքները՝ հասարակությունն էլ ավելի չպառակտելու համար, և հոյւս էր հայտնել, որ իշխանությունների և ընդդիմության միջև բանակցությունները կվերսկսվեն՝ երկրում տիրող ճգնաժամը հաղթահարելու համար:
Հիշեցնենք, որ ապրիլի սկզբից Վենեսուելայում շարունակվում են ընդդիմության կողմից կազմակերպված բողոքի ցույցերը, որոնց արդյունքում արդեն 91 մարդ է զոհվել, հազարից ավելին ստացել են տարբեր աստիճանի մարմնական վնասվածքներ, մոտ 3 հազար մարդ ձերբակալվել է: