Հայտնի է դարձել G20-ի գագաթնաժողովի ընթացքում տեղի ունեցած ցույցերի արդյունքում գրանցված վնասի չափը

Գերմանիայի ապահովագրողների միությունը 12 միլիոն եվրո է գնահատել հուլիսի 7-8-ը Համբուրգում «Մեծ քսանյակի» գագաթնաժողովի ընթացքում քաղաքում կազմակերպված ցույցերի և անկարգությունների հասցրած վնասի չափը. այս մասին տեղեկացնում է Ռիա Նովոստի-ն՝ հղում կատարելով գերմանական աղբյուրներին:

Միության կայքում հրապարակված հայտարարության մեջ նշվում է, որ խոսքը նախնական գնահատման մասին է: «G20-ի գագաթնաժողովի ընթացքում Համբուրգում տեղի ունեցած անկարգությունները 12 միլիոն եվրոյի ապահովագրական վնաս են հասցրել»,- հայտնում են ապահովագրողները:

Նրանց տեղեկությունների համաձայն՝ այդ գումարի մեկ երրորդը տրամադրվելու է վնասված ավտոմեքենաների տերերին: Գագաթնաժողովի ընթացքում ծայրահեղականները այրել են մեքենաները, կոտրել դրանց ապակիներն ու լուսարձակները: Մնացած ութ միլիոն եվրոն կտրամադրվի հարձակման ենթարկված շինությունների, խանութների և սրճարանների վերականգնմանը:

Նշենք, որ «Մեծ քսանյակի» գագաթնաժողովն անցկացվել է հուլիսի 7-8-ը Համբուրգում: Այն ուղեկցվել է հակագլոբալիստների և իրադարձության այլ ընդդիմախոսների կողմից կազմակերպված աննախադեպ անկարգություններով: Մի քանի օր շարունակ քաղաքում բախումներ էին տեղի ունենում ցուցարարների և ոստիկանության միջև, որը ջրցան մեքենաներ և արցունքաբեր գազ էր կիրառում ամբոխը ցրելու համար:

ՏԱՍՍ-ի փոխանցմամբ ցույցերի ընթացքում ընդհանուր առմամբ 300 մարդ է ձերբակալվել, տուժել է ավելի քան 500 ոստիկան: Կատարվածը հետաքննելու համար իրավապահ մարմինները հատուկ հանձնաժողով են կազմել: