Պեկինն ամերիկյան անօդաչու սարքերի կրկնօրինակներ է վաճառում Վաշինգտոնի դաշնակիցներին

ԱՄՆ-ի դաշնակիցները, չկարողանալով նրանից ստանալ առավել արդիական մարտական անօդաչու թռչող սարքեր (ՄԱԹՍ), Չինաստանից գնում են դրանց ավելի էժան տարբերակները. այս մասին գրում է The Wall Street Journal-ը:

Թերթի տվյալների համաձայն՝ վերջերս ԱՄՆ-ի դաշակիցներ Սաուդյան Արաբիան և Հորդանանն ավելի հաճախ են օգտագործում չինական արտադրության մարտական անօդաչու սարքերը:

Խմբագրությունը նշում է, որ արբանյակային պատկերների ուսումնասիրման ժամանակ չինական ՄԱԹՍ-եր են հայտնաբերվել նաև Եգիպտոսի և ԱՄԷ-ի ռազմաբազաբերում: Այդ սարքերն ակտիվորեն օգտագործվում են Ռիադի կողմից Եմենին հարվածներ հասցնելու համար: Հայտնի է, որ խոսքը Predator և Reaper ամերիկյան ՄԱԹՍ-ների չինական կրկնօրինակների մասին է:

WSJ-ի փոխանցմամբ ԱՄՆ-ն արդեն երկար ժամանակ հրաժարվում է առավել հզոր անօդաչու սարքերը վաճառել արտասահմանյան երկրներին՝ այդ թվում նաև մերձավորարևելյան դաշնակիցներին: ԱՄՆ-ի գործընկերներից միայն Մեծ Բրիտանիան է, որ  Predator և Reaper ՄԱԹՍ-ների նորագույն տարբերակները գնելու իրավունք է ստացել:

Թերթը գրում է՝ ԱՄՆ-ի հիմնական մտավախությունն այն է, որ անօդաչու սարքերը կարող են հայտնվել իր թշնամիների ձեռքում, օգտագործվել քաղաքացիական անկարգությունները ճնշելու համար կամ էլ խարխլել Իսրայելի ռազմական գերակայությունը Մերձավոր Արևելքում:

Օգտվելով առիթից՝ Չինաստանը որոշել է բավարարել մարտական մեքենաների պահանջարկը՝ ԱՄՆ-ի դաշնակիցներին տրամադրելով դրանց ավելի էժան կրկնօրինակները: Խմբագրության կարծիքով՝ դա Վաշինգտոնի համար «մարտավարական և առևտրային պարտություն է»:

«Ամերիկյան առևտրային քաղաքականությունը, որը դաշնակիցներին ստիպում է զենք գնել Չինաստանից, վնասում է ԱՄՆ-ին, մերձավորարևելյան գործընկերների հետ հարաբերություններին և շուկայում մրցակցել փորձող ամերիկյան ընկերություններին»,- թերթին հայտնել է Պենտագոնի նախկին աշխատակից, Նոր ամերիկյան անվտանգության կենտրոնի ներկայացուցիչ Փոլ Շարեն:

Սպիտակ տան Ազգային անվտանգության խորհրդի ներկայացուցիչը հայտնել է, որ ԱՄՆ-ի վարչակազմն ուշադրությամբ ծանրութեթև է անում ՄԱԹՍ-ների վաճառքի քաղաքականության բոլոր կողմերը՝ միաժամանակ հետևելով նաև Չինաստանի գործողություններին:

Ահաբեկչության դեմ պայքարի և կիբերանվտանգության հարցերով ԱՄՆ-ի նախագահի օգնական Թոմ Բոսերթն ընդգծել է, որ մարտական անօդաչու սարքերի վաճառքի հարցում անհրաժեշտ է հավասարակշռություն պահպանել տնտեսական օգուտի և անվտանգության միջև: Նրա խոսքով՝ Վաշինգտոնը հավատարիմ է մնում «տեխնոլոգիայի արտահանման ոլորտում հավասարակշռված մոտեցմանը՝ անմեղ կյանքերը վտանգի չենթարկելու համար»: