Դոնեցկում հռչակել են «Մալոռոսիա» պետությունը

Դոնեցկի և Լուգանսկի ժողովրդական հանրապետությունների (ԴԺՀ և ԼԺՀ), ինչպես նաև Ուկրաինայի 19 շրջանների ներկայացուցիչները հայտարարել են «Մալոռոսիա» (Փոքր Ռուսաստան) պետության ստեղծման մասին: Նոր պետության ստեղծման մասին սահմանադրական հռչակագիրն ընթերցվել է ԴԺՀ-ի նախարարների խորհրդի ղեկավարի տեղակալի ժամանակավոր պաշտոնակատար Ալեքսանդր Տիմոֆեևի կողմից:

«Մենք՝ Ուկրաինայի նախկին շրջանների ներկայացուցիչներս, հայտարարում ենք նոր հանրապետության հիմնադրման մասին, որն Ուկրաինայի իրավահաջորդն է: Մենք համաձայն ենք, որ այն կոչվի «Մալոռոսիա», քանի որ Ուկրաինա անվանումն ինքնին վարկաբեկված է»,- ասվում է սահմանադրական որոշման մեջ:

Ավելի վաղ ԴԺՀ-ի առաջնորդ Ալեքսանդր Զախարչենկոն հավաքվածների համար ընթերցել էր քաղաքական հռչակագիր, որում հիմնավորված էր եղել «Մալոռոսիա»-ի ստեղծման անհրաժեշտությունը: Նրա խոսքերով՝ նոր դաշնային պետության հիմնադրման նպատակն է «դադարեցնել քաղաքացիական պատերազմը և խուսափել նոր զոհերից»:

ՏԱՍՍ-ի փոխանցմամբ՝ բոլոր ներկայացուցիչները միաձայն հաստատել են երկու փաստաթղթերը: Դոնբասի ներկայացուցիչներին իրենց աջակցությունն են առաջարկել Խարկովի, Դնեպրոպետրովսկի, Զապորոժսկի, Խերսոնսկի, Նիկոլաևսկի, Օդեսայի, Սումսկի, Պոլտավսկի, Չերնիգովսկի, Կիրովգրադի, Չերկասկի, Ռովենսկի, Վոլինսկի, Տերնոպոլի, Իվանո-Ֆրանկովսկի, Լվովի շրջանների, ինչպես նաև Կիևի ներկայացուցիչներին:

«Մալոռոսիա»-ի սահմանադրական որոշման համաձայն՝ նոր պետության մայրաքաղաքը պետք է դառնա Դոնեցկը, մինչդեռ Կիևը կպահպանի պատմամշակութային կենտրոնի կարգավիճակը: Դոնեցկի լրատվական գործակալության տվյալներով՝ նոր պետության դրոշի վրա պատկերված կլինի Բոգդան Խմելնիցկու զինանշանը:

Սահմանադրությունը նախնական տարբերակով կընդունվի սահմանադրական հանձնաժողովի կողմից, ապա համազգային հանրաքվե կկազմակերպվի այն հաստատելու համար: Մինչ այդ հանրային քննարկումներ կանցկացվեն շրջանային և դաշնային մակարդակով: