Գերմանիայի արտգործնախարարը կողմ է հակառուսական պատժամիջոցների չեղարկմանը
Գերմանիայի արտգործնախարար Սիգմար Գաբրիելը կարծում է, որ անհրաժեշտ է աստիճանաբար չեղարկել հակառուսական պատժամիջոցները. նրա խոսքերը փոխանցում է գերմանական Focus ամսագիրը:
«Եվրամիության որոշման համաձայն՝ Մինսկի համաձայնագրերը պետք է 100%-ով իրականացվեն, որպեսզի հակառուսական պատժամիջոցներն ամբողջությամբ վերացվեն: Իմ կարծիքով՝ դա անիրականանալի է: Ավելի ճիշտ կլիներ հաջորդաբար չեղարկել պատժամիջոցները՝ ցույց տալով, որ պետք է շարժվել խաղաղության ուղղությամբ»,- ասել է Գաբրիելը:
Բացի այդ, Գերմանիայի ԱԳ նախարարը դրական է արտահայտվել Մոսկվայի նկատմամբ Բեռլինի նոր քաղաքականության մասին, որի նպատակը լարվածության թուլացումն է: Ռուսաստանի նախագահ Վլադիմիր Պուտինի հետ հաճախակի հանդիպումները նա բացատրել է «բազմաթիվ խնդիրների» առկայությամբ:
Մինսկի համաձայնագրերը 2015 թ. «նորմանդյան քառյակի»՝ Գերմանիայի, Ֆրանսիայի, Ուկրաինայի և Ռուսաստանի կողմից ստորագրված փաստաթուղթ է: Այն ուղղված է Ուկրաինայի արևելքում տիրող հակամարտության խաղաղ հանգուցալուծմանը, այդ թվում նաև Դոնբասում հրադադարի հաստատմանը, ծանր զինամթերքի դուրսբերմանը և տարածաշրջանի հատուկ կարգավիճակի օրենսդրական ամրապնդմանը:
Ինչպես նշում է Լենտա-ն, Արևմուտքի երկրները մշտապես Մոսկվայի վրա են դնում Մինսկի համաձայնագրերի իրականցման պարտականությունը և դրա հետ են կապում պատժամիջոցնելի վերացումը: Ռուսաստանն իր հերթին հիշեցնում է, որ ինքը Մինսկի գործընթացի երաշխավորներից է, այլ ոչ թե հակամարտության կողմերից մեկը:
Նշենք, որ Ղրիմը Ռուսաստանի կազմի մեջ է մտել 2014 թ. հանրաքվեի արդյունքերի համաձայն, որոնք, սակայն, չեն ընդունվում Կիևի կողմից: Մոսկվան պնդում է, որ հանրաքվեն իրականացվել է միջազգային իրավունքի բոլոր կանոնների համաձայն: