Եվրոպան Իսրայելի նկատմամբ «խենթ» քաղաքականություն է վարում. Նեթանյահու
Իսրայելի վարչապետ Բենիամին Նեթանյահուն դատապարտել է իր երկրի նկատմամբ Եվրամիության «խենթ» քաղաքականությունը. գրում է BBC-ն:
Հունգարիայի մայրաքաղաք Բուդապեշտում կայացած փակ նիստի ընթացքում նրա արած մեկնաբանությունները պատահաբար հեռարձակվել են լրագրողների կողմից:
Հունգարիայի, Չեխիայի, Լեհաստանի և Սլովակիայի վարչապետերի հետ հանդիպման ընթացքում Նեթանյահուն ասել է. « Եվրամիությունը միակ հիմնական ուժն է, որ կարող է քաղաքական պայմաններ թելադրել Իսրայելի հետ հարաբերություններում»:
Ինչպես նշում է BBC-ն, վարչապետը նկատի է ունեցել իսրայելապաղեստինյան հակամարտության խաղաղ կարգավորման գործընթացում ԵՄ-ի կողմից պայմանների պարտադրումը՝ 2000 թ. կնքված և հետագայում թարմացված «Իսրայելի հետ ասոցացման համաձայնագրի» շրջանակներում:
«Դա խեթություն է, դա իրոք խենթություն է: Ես չեմ խոսում իմ շահերի մասին, ես խոսում Եվրոպայի շահերի մասին»,- ասել է Նեթանյահուն:
«Մենք հատուկ հարաբերություններ ունենք Չինաստանի հետ, և նրանց դա չի հետաքրքրում: Նրանց չեն հետաքրքրում քաղաքական հարցերը: Սա անտրամաբանական է: Եվրամիությունը սասանում է իր անվտանգությունը՝ խաթարելով Իսրայելին: Եվրոպան խաթարում է իր առաջընթացը՝ խաթարելով իսրայելական նորարարության հետ կապը և փորձելով պայմաններ թելադրել»,- հավելել է նա:
Իսրայելի վարչապետը նշել է, որ Եվրոպան պետք է որոշի՝ արդյո՞ք «ուզում է ապրել և զարգանալ, թե չորանալ և անհետանալ»:
«Քաղաքականապես դա ճիշտ չի հնչում: Գիտեմ՝ ձեզնից շատերի համար սա զարմանալի է, բայց ինչ ճիշտ է՝ ճիշտ է: Դա վերաբերում թե՛ Եվրոպայի անվտանգությունը և թե՛ տնտեսական ապագային: Երկու հարցերն էլ այլ քաղաքականություն են պահանջում Իսրայելի նկատմամբ»,- ասել է նա:
Նեթանյահուն քննադատել է նաև ԱՄՆ-ի նախկին նախագահ Բարաք Օբամայի վարչակազմի քաղաքականությունը՝ ասելով, որ Թրամփի՝ պաշտոնն ստանձնելուց ի վեր վիճակը բարելավվել է:
«Առաջ մենք շատ մեծ խնդիր ունեինք, հիմա ավելի լավ է: Իրանի հանդեպ դիրքորոշումը խստացել է»,- ընդգծել է նա՝ ընդունելով, որ Իսրայելը տասնյակ հարձակումներ է իրականացրել շիական «Հեզբոլլահ» խմբավորման դեմ Սիրիայում:
Հունգարիայի վարչապետ Վիկտոր Օրբանը լրագրողներին հայտնել է, որ համաձայն է իսրայելցի գործընկերոջ հետ. «Մենք կիսում ենք արտաքին սահմանները պահելու վերաբերյալ Իսրայելի անհանգստությունը: Եթե Եվրոպան չհամագործակցի Իսրայելի հետ, այն կպատժի ինքն իրեն»: