Բրազիլիայի դատարանը հրաժարվել է չեղարկել նախկին նախագահի ունեցվածքի վրա դրված կալանքը. Globo
Դատավոր Ժոաո Պեդրու Ժերբան Նետուն հրաժարվել է բավարարել Բրազիլիայի նախկին նախագահ Լուիս Ինասիու Լուլա դա Սիլվայի բողաքարկումը, որը ցանկանում էր հասնել իր բանկային հաշիվների և այլ ունեցվածքների վրա դրված կալանքի չեղարկմանը. տեղեկացնում է Globo հեռուստաալիքը:
Դատավորի կարծիքով՝ ունեցվածքի կալանքը «սահմաված է հանցագործությունների արդյունքում պետությանը հասցված վնասի փոխհատուցումը երաշխավորելու համար», ուստի պետք է ուժի մեջ մնա:
Ինչպես նշում է ՏԱՍՍ-ը, հուլիսի 12-ին դատարանը Լուլա դա Սիլվային դատապարտեց ինը տարի և վեց ամիս ազատազրկման՝ նրան մեղավոր ճանաչելով կաշառակրության և փողերի լվացման մեջ: Նախկին նախագահին արգելվել է նաև 19 տարվա ընթացքում պետական պաշտոններ զբաղեցնել: Լուլա դա Սիլվան բողոքարկել է այդ որոշումը: Մինչև բողոքի քննության ավարտը քաղաքական գործիչն ազատության մեջ կմնա:
Բացի այդ, դատարանը որոշում է կայացրել Lուլա դա Սիլվայի բանկային հաշիվների՝ ընդհանուր առմամբ 606 հազար ռեալ գումարի (192 հազար դոլար) սառեցման վերաբերյալ: Կալանքի տակ են նաև նրա երեք բնակարանները, հողակտորը և երկու ավտոմեքենաները: Դատավճռում ասվում է, որ նախկին նախագահը կարող է օգտագործել դրանք, սակայն մինչև երկրորդ դատական ատյանի որոշումն իրավունք չունի սեփականությունները վաճառելու կամ նվիրելու: Նշված ունեցվածքին ավելացվել է 9 միլիոն ռեալ (3.9 միլիոն դոլար), որը քաղաքական գործիչը յուրացրել է երկու մասնավոր կենսաթոշակային հիմնադրամների հատկացումներից: